తెలంగాణలో టిడిపి గల్లంతేనా, అయినా చంద్రబాబుకు పట్టదా?

By Pratap

Published: Tuesday, March 15, 2011, 9:20 [IST]

హైదరాబాద్ : తెలంగాణలో తెలుగుదేశం పార్టీ గల్లంతైనట్లేననే అభిప్రాయం వ్యక్తమవుతోంది. ఈ అభిప్రాయం వ్యక్తం చేస్తోంది ప్రత్యర్థులు కారు, స్వయంగా పార్టీ నాయకులే అంటున్నారు. సోమవారం జరిగిన తెలంగాణ మాక్ అసెంబ్లీ కార్యక్రమంలో తెలుగుదేశం తెలంగాణ ప్రాంత శాసనసభ్యుడు ఎర్రబెల్లి దయాకర రావు ఆ అభిప్రాయాన్ని వ్యక్తం చేశారు. పార్టీ మీద పోటీ చేస్తే తాము గెలిచే పరిస్థితి లేదని దయాకర రావు అన్నారు. తెలుగుదేశం పార్టీ అధ్యక్షుడు నారా చంద్రబాబు నాయుడు రెండు కళ్ల సిద్ధాంతంతో తెలంగాణకు వ్యతిరేకంగా పనిచేస్తున్నారనే అభిప్రాయం బలపడడం వల్లనే ఈ పరిస్థితి వచ్చిందనేది అందరికీ తెలిసిన విషయమే. కానీ, తాజాగా తెలుగుదేశం శాసనసభ్యుడే ఆ మాట అనడం ప్రాధాన్యం సంతరించుకుంది.

మాక్ అసెంబ్లీ కార్యక్రమంలో కాంగ్రెసు తెలంగాణ ప్రాంత శాసనసభ్యులు, బిజెపి, సిపిఐ శాసనసభ్యులు పాల్గొనలేదు. తెలుగుదేశం తెలంగాణ ప్రాంత శాసనసభ్యులు, తెలంగాణ రాష్ట్ర సమితి (తెరాస) శాసనసభ్యులు పాల్గొన్నారు. తెలంగాణ రాష్ట్ర సాధన కోసం తెలంగాణ ప్రాంత ప్రజాప్రతినిధులంతా కలిసి పనిచేయాలని ఈ కార్యక్రమంలో ఓ తీర్మానం చేశారు. తెలంగాణలో తెలుగుదేశం పరిస్థితి పూర్తిగా దిగజారిపోవడంతోనే నాగం జనార్దన్ రెడ్డి వంటి తెలుగుదేశం తెలంగాణ ప్రాంత శాసనసభ్యులు తెలంగాణపై దూకుడుగా వెళ్తున్నారనేది అర్థం చేసుకోవచ్చు.

Published On March 15, 2011