జగన్ ఓటమి ప్రారంభమైంది: మంత్రి డిఎల్ రవీంద్రారెడ్డి

By Srinivas

Published: Wednesday, March 16, 2011, 15:21 [IST]

హైదరాబాద్: మాజీ పార్లమెంటు సభ్యుడు వైఎస్ జగన్మోహన్ రెడ్డి ఓటమి ప్రారంభమైందని రాష్ట్ర ప్రాథమిక, ఆరోగ్య శాఖ మంత్రి డిఎల్ రవీంద్రారెడ్డి బుధవారం విలేకరులతో మాట్లాడుతూ చెప్పారు. శాసనమండలి ఎన్నికల్లో జగన్‌కు ఎదురు దెబ్బ తగిలిందని ఆయన అన్నారు. టీచర్, గ్రాడ్యుయేట్ శాసనమండలి ఎన్నికలలో జగన్ తరఫున నిలబడిన అభ్యర్థులు ఓడి పోయారన్నారు. దీంతో జగన్ ఓటమి ప్రారంభమైందన్నారు.

ఈ ఓటమితో జగన్ ఉప ఎన్నికలలో పోటీ చేస్తారో లేదో చూడాలని అన్నారు. త్వరలో పులివెందుల అసెంబ్లీ స్థానానికి, కడప పార్లమెంటు స్థానానికి ఉప ఎన్నికలు ఉన్నందున జగన్ తన పోటీపై మరోసారి నిర్ణయించుకుంటారో చూడాలని అన్నారు.

Published On March 16, 2011