రాజీనామా ఉపసంహరణపై మొండికేస్తున్న జూపల్లి కృష్ణారావు

హైదరాబాద్‌: మంత్రి పదవికి తాను చేసిన రాజీనామాను ఉపసంహరించుకునే విషయంలో దేవాదాయ శాఖ మంత్రి జూపల్లి కృష్ణారావు మొండికేస్తున్నారు. తెలంగాణపై తేల్చే వరకు రాజీనామాను ఉపసంహరించుకునే ప్రసక్తి లేదని ఆయన బుధవారం మీడియా ప్రతినిధులతో అన్నారు. బుజ్జగించడానికి తాను చిన్నపిల్లాడిని ఏమీ కాదని ఆయన వ్యాఖ్యానించారు. తెలంగాణ రాష్ట్ర ఏర్పాటుకు నిర్ణయం తీసుకోవాలని డిమాండ్ చేస్తూ జూపల్లి కృష్ణారావు ఇటీవల మంత్రి పదవికి రాజీనామా చేసిన విషయం తెలిసిందే.

తాను మంత్రిగా విధులు నిర్వహించే ప్రసక్తి లేదని ఆయన స్పష్టం చేశారు. తన రాజీనామాపై తమ పార్టీ కాంగ్రెసు అధిష్టానం నిర్ణయం తీసుకుంటుందని ఆయన చెప్పారు. ఈ నెల 25వ తేదీన తాను గవర్నర్ నరసింహన్ వద్దకు వెళ్లి రాజీనామాను ఆమోదింపజేసుకోవడం అనేది పార్టీ అధిష్టానం నిర్ణయం మీదనే ఆధారపడి ఉంటుందని ఆయన చెప్పారు. తెలంగాణ రాష్ట్ర ఏర్పాటు కోసం మాత్రమే తాను రాజీనామా చేశానని, దానికి కట్టుబడి ఉన్నానని ఆయన చెప్పారు.

English summary

Endowment minister Jupalli Krishna rao rejected to withdraw his resignation. He said that withdrawing of resignation will depend on Congress high command decision on telangana issue. He resigned for his minister ship demanding Telangana state formation.