క్రాస్ ఓటింగ్ విషయం డైవర్ట్ చేయడానికే విలీనం: గద్దర్

హైదరాబాద్: తెలంగాణ రాష్ట్ర సమితి పార్టీకి చెందిన ముగ్గురు శాసనసభ్యులు క్రాస్ ఓటింగుకు పాల్పడిన విషయంలో ప్రజల దృష్టి మరల్చడానికే విలీనం ఇష్యూ వచ్చిందని తెలంగాణ ప్రజా ఫ్రంట్ చైర్మన్, ప్రజా గాయకుడు గద్దర్ మంగళవారం ఆరోపించారు. తెలంగాణ ఉద్యమం కోసం అంటూ పుట్టిన పార్టీలోని వారే క్రాస్ ఓటింగుకు పాల్పడటం విచారకరమన్నారు. కెసిఆర్ ఏ ప్రకటన చేసినా రాతపూర్వకంగా చేయాలని గద్దర్ సూచించారు. ఉద్యమం ఉవ్వెత్తున ఎగిసిన ఈ సమయంలో రాతపూర్వకంగా ఉంటేనే బాగుంటుందని అన్నారు.

తెలంగాణ తెస్తామన్న వారు తేలేక పోయారని, ఇస్తామన్న వారు ఇవ్వలేక పోయారన్నారు. ఇక వారు తేవాల్సిన, ఇవ్వాల్సిన అవసరం లేదన్నారు. ప్రజలే తెలంగాణ రాష్ట్రాన్ని తెచ్చుకుంటారని చెప్పారు. తెలంగాణ ఉద్యమాన్ని అణిచి వేసేందుకు కాంగ్రెసు ప్రభుత్వం కుట్ర చేస్తుందన్నారు. ప్రభుత్వం ఎన్ని కుట్రలు చేసిన తెలంగాణ ప్రజలు ఉద్యమంలో పాల్గొని తెలంగాణ సాధించుకుంటారని ఆశాభావం వ్యక్తం చేశారు.

English summary

Telangana Praja Front chairman Gaddar said today that TRS merger in Congress came up to divert cross voting issue. He said Congress writing strategy to destroy Telangana agiatation.