ఎన్నికలు పొలిటికల్ గేమ్‌లో భాగం: మంత్రి దానం నాగేందర్

హైదరాబాద్: ఎన్నికలు రాజకీయ ఆటలో ఓ భాగం అని మంత్రి దానం నాగేందర్ బుధవారం అసెంబ్లీ మీడియా పాయింట్ వద్ద విలేకరులతో మాట్లాడుతూ చెప్పారు. స్థానిక సంస్థల ఎన్నికలలో ఫలితాల వల్ల ఎలాంటి నిరుత్సాహం లేదన్నారు. ఎన్నికలలో ఓటమికి కారణాలు అన్వేషిస్తామని చెప్పారు. ఎక్కడ తప్పు జరిగిందో తెలుసుకుంటామని చెప్పారు. క్రాస్ ఓటింగ్ వల్లే కాంగ్రెసు నష్టపోయిందన్నారు. క్రాస్ ఓటింగ్‌కు పాల్పడిన వారిపై తప్పకుండా చర్యలు తీసుకుంటామని చెప్పారు. సాధారణ ఎన్నికలకు ఇంకా మూడు సంవత్సరాల కాలముందని చెప్పారు.

కాంగ్రెసు పార్టీ బలపడుతుందని చెప్పారు. ముఖ్యమంత్రి కిరణ్ కుమార్ రెడ్డి ప్రభుత్వం ప్రజలకు సంక్షేమ పథకాలు ప్రవేశ పెడుతోందని అన్నారు. ఆ సంక్షేమ పథకాలే కాంగ్రెసు బలోపేతానికి ఉపయోగపడతాయని చెప్పారు. దివంగత ముఖ్యమంత్రి వైయస్ రాజశేఖరరెడ్డి ప్రవేశ పెట్టిన సంక్షేమ పథకాలు అన్నింటిని అమలు చేస్తున్నామన్నారు. దేశంలో మరెక్కడా రాష్ట్రంలో ప్రవేశ పెట్టిన పథకాలు లేవన్నారు. వచ్చే ఎన్నికలలో మళ్లీ కాంగ్రెస్ తప్పకుండా గెలుస్తుందన్నారు.

English summary

Minister Danam Nagender said today that congress defeated in mlc election due to cross voting. he said election is part of political game.