చంద్రబాబు గురివింద, రేవంత్‌ రెడ్డి మాటేమిటి: అంబటి రాంబాబు

గుంటూరు: తెలుగుదేశం పార్టీ అధ్యక్షుడు చంద్రబాబునాయుడు తీరు గురివింద గింజ తీరుగా ఉందని మాజీ పార్లమెంటు సభ్యుడు వైయస్ జగన్ వర్గం నేత అంబటి రాంబాబు మంగళవారం విలేకరులతో అన్నారు. గురివింద గింజకు తన కింద ఉన్న నల్లదనాన్ని గుర్తించనట్లే చంద్రబాబు తమ పార్టీ సభ్యులు చేసిన విషయాన్ని మరిచి మంత్రి దాడిపై ప్రశ్నిస్తున్నారని అన్నారు. మంత్రి వైయస్ వివేకానందరెడ్డి టిడిపి ఎమ్మెల్యేలపై దాడి చేయడాన్ని మేం సమర్థించడం లేదని అన్నారు.

అయితే చంద్రబాబు మాత్రం గతంలో తమ పార్టీ ఎమ్మెల్యేల ప్రవర్తనపై ఓసారి ఆత్మపరిశీలన చేసుకోవాలన్నారు. గతంలో ఓ ఎమ్మెల్యే కాంగ్రెసు పార్టీ ఎమ్మెల్యేపై అటాక్ చేసిన విషయం చంద్రబాబుకు తెలియదా అని ప్రశ్నించారు. ఇటీవలె ఈ సమావేశాలు ప్రారంభం అయినప్పుడు టిడిపి ఎమ్మెల్యే రేవంత్ రెడ్డి సాక్ష్యాత్తూ గవర్నర్ కుర్చీనే ఎత్తుకు వెళ్లడానికి ప్రయత్నాలు చేశారని దానిపై చంద్రబాబు ఎందుకు మాట్లాడటం లేదని ప్రశ్నించారు. ఎవరినైనా విమర్శించే ముందు తమ చరిత్ర తెలుసుకోవాలని అన్నారు.

English summary

YSR Congress party leader Ambati Rambabu questioned TDP president Chandrababu Naidu on TDP MLA Revanth Reddy attitude in assembly. He also condemned minister YS Viveka attack on TDP MLAs.