దమ్ముంటే ఎమ్మెల్యే పదవికి రాజీనామా చేయాలి: దేవినేనికి వల్లభనేని సవాల్

By Srinivas

Published: Friday, April 1, 2011, 11:20 [IST]

విజయవాడ: జిల్లా శాసనసభ్యుడు దేవినేని ఉమా మహేశ్వరరావుకు దమ్ముంటే ఎమ్మెల్యే పదవికి రాజీనామా చేయాలని తెలుగుదేశం పార్టీ జిల్లా నేత వల్లభనేని వంశీ శుక్రవారం డిమాండ్ చేశారు. ఆయన జిల్లా అధ్యక్ష పదవికి రాజీనామా చేయడం కాదన్నారు. దమ్ముంటే ఎమ్మెల్యే పదవికి రాజీనామా చేసి దివంగత టిడిపి వ్యవస్థాపక నేత ఎన్టీ రామారావు బొమ్మ లేకుండా గెలవాలని సవాల్ విసిరారు.

హరికృష్ణ పర్యటన సందర్భంగా ఉమ తీరును తనను బాధించిందని ఆయన అన్నారు. అందుకే తాను జిల్లా అర్బన్ అధ్యక్ష పదవికి రాజీనామా చేసినట్టు తెలిపారు. తన రాజీనామాను రాష్ట్ర పార్టీ కార్యాలయానికి ఫాక్స్ చేస్తానని ఆయన చెప్పారు. దేవినేని ఉమ, తన సోదరుడు దేవినేని నెహ్రూపై పోటీ చేయాలని డిమాండ్ చేశారు. ఇద్దరూ వేరు వేరు నియోజకవర్గాలలో పోటీ చేయడం కాకుండా ఒకే నియోజకవర్గంలో పోటీ చేసి ఎవరి సత్తా ఏంటో తెలుసుకోవాలన్నారు. కొడాలి నాని దేవినేనిపై చేసిన వ్యాఖ్యలను వల్లభనేని సమర్థించారు.

Published On April 1, 2011