రాజీనామా చేసి గెలిచే దమ్ముందా: కెసిఆర్‌కు ఎర్రబెల్లి సవాల్

By Srinivas

Published: Thursday, April 14, 2011, 14:00 [IST]

వరంగల్: ప్రత్యేక తెలంగాణ రాష్ట్రంపై తెలంగాణ రాష్ట్ర అధ్యక్షుడు కల్వకుంట్ల చంద్రశేఖరరావుకు చిత్తశుద్ధి ఉంటే మహబూబ్‌నగర్ పార్లమెంటు సభ్యత్వానికి రాజీనామా చేసి మళ్లీ గెలవాలని తెలుగుదేశం పార్టీ సీనియర్ ఎమ్మెల్యే ఎర్రబెల్లి దయాకరరావు గురువారం డిమాండ్ చేశారు. తాను కూడా రాజీనామాకు సిద్ధమని, కెసిఆర్ రాజీనామా చేస్తే ఇద్దరం కలిసి మళ్లీ ఎన్నికలలోకి వెళదామని సవాల్ విసిరారు. అప్పుడు తెలంగాణపై చిత్తశుద్ధి ఎవరికి ఉందో ప్రజలు తేల్చుతారని అన్నారు.

ఇద్దరం రాజీనామా చేసి తెలంగాణ జాయింట్ యాక్షన్ తరఫున పోటీ చేద్దామని అన్నారు. కేసిఆర్ రంగారెడ్డి జిల్లాలో చేస్తున్న చండీయాగం తెలంగాణ కోసమా లేక కుటుంబ పాలన కోసమా అని ప్రశ్నించారు. తెలంగాణలో టిడిపిని అడ్డుకుంటామన్న కెసిఆర్ వ్యాఖ్యలను ఆయన ఖండించారు. టిడిపిని అడ్డుకోవాలని చూస్తే టిఆర్‌ఎస్ నేతలను కూడా టిడిపి అడ్డుకుంటుందని హెచ్చరించారు.

Published On April 14, 2011