జగన్ వెళ్లేది పార్లమెంటుకు కాదు, తీహార్ జైలుకు: గోరంట్ల బుచ్చయ్య చౌదరి

By Pratap

Published: Thursday, April 14, 2011, 17:00 [IST]

హైదరాబాద్‌: వైయస్సార్ కాంగ్రెసు పార్టీ నాయకుడు వైయస్ జగన్మోహన్ రెడ్డి వెళ్లేది పార్లమెంటుకు కాదని తీహార్ జైలుకని తెలుగుదేశం పార్టీ సీనియర్ నాయకుడు గోరంట్ల బుచ్చయ్య చౌదరి అన్నారు. జగన్‌కు పార్లమెంట్‌కు వెళ్లే అర్హత లేదని కేవలం తీహార్‌ జైలుకెళ్లే అర్హత మాత్రమే ఉందని ఆయన గురువారం మీడియా ప్రతినిధుల సమావేశంలో అన్నారు. తను సీఎం అయితే తొలి సంతకం గండికోట రిజర్వాయర్‌ నిర్వాసితుల పరిహారం ఫైలుపై పెగతానన్న జగన్‌ వ్యాఖ్యలను ఆయన ఎద్దేవా చేశారు. ఈ వ్యాఖ్యల్ని జోక్‌ ఆఫ్‌ ది ఇయర్‌గా బుచ్చయ్య చౌదరి అభివర్ణించారు.

కడప పార్లమెంట్‌కు పోటీ చేస్తూ ముఖ్యమంత్రి ఎలా అవుతావని ఆయన ప్రశ్నించారు. ఆ ఉద్దేశముంటే తన వెంట ఉన్న ఎమ్మెల్యేలందరితోనూ రాజీనామాలు చేయించి ఎన్నికలకు సిద్ధం కావాల్సిందని అన్నారు. టెలికమ్ మాజీ మంత్రి ఎ రాజా జైల్లో జగన్‌ కోసమే ఎదురుచూస్తున్నారని ఆయన అన్నారు. అతిత్వరలోనే జగన్‌కు జైలుకెళ్లే పరిస్థితులు వస్తాయన్నారు. వైయస్ జగన్ ముఖ్యమంత్రి అయితే ఎన్ని ఫైళ్ల మీద తొలి సంతకం చేస్తారని తెలుగుదేశం నేత పుష్పలీల అడిగారు.

Published On April 14, 2011