విమలక్క ఆధ్వర్యంలో లగడపాటి లాంకోపై దాడి, ఫర్నీచర్ ధ్వంసం

By Srinivas

Published: Thursday, April 14, 2011, 14:52 [IST]

హైదరాబాద్: విజయవాడ పార్లమెంటు సభ్యుడు లగడపాటి రాజగోపాల్‌కు చెందిన లాంకో హిల్సుపై పలువురు తెలంగాణ వాదులు తెలంగాణ యునైటెడ్ ఫ్రంట్ ఆధ్వర్యంలో దాడి చేశారు. ఈ కార్యాలయం హైదరాబాదులోని గచ్చిబౌలిలో ఉంది. లాంకో హిల్సును స్వాధీనం చేసుకోవడానికి వారు దాడి చేసినట్టుగా తెలుస్తోంది. అక్కడ వారు తెలంగాణకు అనుకూలంగా ఉన్న జెండాలు పాతారు. ల్యాంకో హిల్సుపై దాడి చేసిన కార్యకర్తలు కార్యాలయంలోని ఫర్నీచర్‌తో పాటు గేటును కూడా పూర్తిగా ధ్వంసం చేశారు.

కాగా సుమారు 200 మంది కార్యకర్తలు ఈ దాడిలో పాల్గొన్నారు. అరుణోదయ విమలక్క ఆధ్వర్యంలో ఈ దాడి జరిగినట్టుగా తెలుస్తోంది. యునైటెడ్ ఫ్రంట్ కార్యకర్తలు సుమారు 30 అంతస్తుల వరకు ఎక్కినట్లు తెలుస్తోంది. దీంతో అక్కడ భారీగా పోలీసులను మోహరించారు.

Published On April 14, 2011