సత్యసాయి బాబాను చూపించాలని శివ సాయిబాబా ధర్నా, అరెస్టు

By Pratap

Published: Friday, April 22, 2011, 17:17 [IST]

పుట్టపర్తి‌: కర్ణాటకలోని చిక్‌భల్లాపూర్ శివసాయి బాబా శుక్రవారం పుట్టపర్తి వచ్చారు. తనకు సత్యసాయి బాబాను చూపించాలని పట్టుబట్టారు. అయితే, ఆస్పత్రిలోకి వెళ్లడానికి ప్రయత్నించిన శివసాయిబాబాను పోలీసులు అడ్డుకున్నారు. దీంతో ఆయన అక్కడే ధర్నాకు దిగారు. దీంతో తీవ్ర ఉద్రిక్తత నెలకొంది. శివసాయి బాబాను పోలీసులు బలవంతంగా అరెస్టు చేసి పోలీసు స్టేషనుకు తరలించారు. తనకు సత్య సాయిబాబాను చూపించాల్సిందేనని, సత్య సాయిబాబా ఇచ్చే సందేశాన్ని తాను భక్తులకు చేరవేస్తానని ఆయన చెప్పారు.

తాను చిన్నప్పుడు సత్య సాయిబాబాను దర్శించుకున్నానని, తనను సత్య సాయిబాబా ఆయన ప్రతిరూపంగా చెప్పారని శివసాయి బాబా అన్నారు. పోలీసుల తీరు పట్ల ఆయన తీవ్ర ఆగ్రహం వ్యక్తం చేశారు. కాగా, స్థానిక ఉజ్వల అతిథి గృహంలో సత్య సాయిబాబా ట్రస్టు సభ్యులు స్థానిక రాజకీయ నాయకులతో సమావేశమయ్యారు. సూపర్ స్పెషాలిటీ ఆస్పత్రిలో సత్యసాయి సెంట్రల్ ట్రస్టు సభ్యులు సమావేశమయ్యారు. పుట్టపర్తికి పొరుగు జిల్లాల నుంచి పెద్ద యెత్తున పోలీసులను పిలిపిస్తున్నారు. పుట్టపర్తిలో నిషేధాజ్ఢలు విధించారు.

Published On April 22, 2011