భారీ స్క్రీన్లు, పోలీసు బలగాలు: ఏర్పాట్లన్నీ అంతిమ యాత్రకేనా?

By Srinivas

Published: Friday, April 22, 2011, 13:55 [IST]

అనంతపురం: పుట్టపర్తిలో చేస్తున్న ఏర్పాట్లు అన్నీ భగవాన్ శ్రీ సత్యసాయిబాబా సజీవ సమాధికేనా అని పలువురు భక్తులు అనుమానం వ్యక్తం చేస్తున్నారు. బాబా సజీవ సమాధి అవుతాడని వార్తలు వచ్చిన నేపథ్యంలో ప్రభుత్వం, ట్రస్టు చేస్తున్న ఏర్పాట్లను తరిచి చూస్తే బాబా సజీవ సమాధికి ఏర్పాట్లు చక చకా సాగిపోతున్నట్టుగా కనిపిస్తోందని పలువురు అనుమానం వ్యక్తం చేస్తున్నారు. ఇప్పటికే ధర్మవరంలో భారీ స్క్రీన్లను ఏర్పాటు చేశారు. పుట్టపర్తికి మూడు హైపవర్ జెనరేటర్లు తరలించారు. ఎపిఎస్పీ రెండో బెటాలియన్ బ్యాండ్ పార్టీని కూడా తరలించారు. కడప, వరంగల్ జిల్లాకు చెందిన ఎపిఎస్పీ బెటాలియన్ పోలీసులు కర్నూలులో సిద్ధంగా ఉన్నారు. కర్నూలు ఎపిఎస్పీ బెటాలియన్ ఇప్పటికే పుట్టపర్తికి తరలి వెళ్లింది.

ఇప్పటికే ఖాకీ వనంగా మారిన పుట్టపర్తిలో మరిన్ని వేల పోలీసు బలగాలను మోహరించడానికి ప్రభుత్వం సిద్ధంగా ఉంది. ఐజి స్థాయి అధికారి స్వయంగా పర్యవేక్షిస్తున్నారు. పలువురు డిఐజిలు అక్కడే మకాం వేశారు. కర్ణాటక అధికారుల బృందం కూడా పుట్టపర్తి బయలు దేరింది. పుట్టపర్తిలో ప్రత్యేక విమానాలు, హెలికాప్టర్లు దిగేందుకు జిఏడి అధికారులు పర్యవేక్షిస్తున్నారు. బాబాను చూడటానికి ప్రధాని మన్మోహన్ సింగ్, రాష్ట్రపతి ప్రతిభా పాటిల్‌తో పాటు పలు రాష్ట్రాల ముఖ్యమంత్రులు, మంత్రులు, కేంద్ర మంత్రులు రానున్నట్లుగా తెలుస్తోంది.

కాగా ఇప్పటికీ బాబా ఆరోగ్యం విషమంగానే ఉన్నట్లుగా తెలుస్తోంది. బాబా ఆరోగ్యం వైద్యానికి ఏ మాత్రం సహకరించడం లేదని తెలుస్తోంది. సిఆర్ఆర్టీ ద్వారానే డయాలసిస్ కొనసాగిస్తున్నారు. ఉదయం డాక్టర్లు విడుదల చేసిన బులెటిన్ కూడా బాబా పరిస్థితి విషమంగానే ఉన్నట్టు తెలుపుతుంది.

Published On April 22, 2011