నేడే కేట్ మిడిల్‌టన్‌తో యువరాజు విలియమ్స్ పెళ్లి

లండన్: ప్రిన్స్‌ విలియం (28), కేట్‌మిడిల్‌టన్‌ (29) వివాహానికి బ్రిటన్‌ సిద్ధమైంది. ప్రాచీనకాలం నాటి వెస్ట్‌మినిస్టర్‌ చర్చిలో శుక్రవారం జరిగే పెళ్లి వేడుకలను తిలకించటానికి వచ్చిన వారితో లండన్‌ వీధులన్నీ నిండిపోయాయి. ఈ శుక్రవారాన్ని బ్రిటన్‌ ప్రభుత్వం జాతీయ సెలవుగా ప్రకటించింది. ఉదయం 11 గంటలకు మొదలయ్యే వివాహ ఘట్టాన్ని ప్రత్యక్షప్రసారం చేయటానికి అంతర్జాతీయ ఛానళ్లన్నీ ఏర్పాట్లు చేసుకున్నాయి. విలియం తల్లిదండ్రులు ప్రిన్స్‌ ఛార్లెస్‌, లేడీ డయానా వివాహం 1981లో జరిగినప్పుడు 75 కోట్ల మంది టీవీల్లో తిలకించారు. బ్రిటన్‌ రాచకుటుంబ వివాహాల్లో అత్యధికులు వీక్షించిన ఘట్టంగా ఈ వివాహం రికార్డు సృష్టించింది.

ఇంటర్‌నెట్‌ కూడా తోడవటంతో విలియం, మిడిల్‌టన్‌ వివాహాన్ని దాదాపు 200 కోట్ల మంది చూడవచ్చన్న అంచనాలున్నాయి. ఇది మొత్తం ప్రపంచ జనాభాలో మూడోవంతు. మరోవైపు, 'భర్త మాటను శిరసావహిస్తా' అనే పదం లేని పెళ్లి ప్రమాణాన్ని కేట్‌ మిడిల్‌టన్‌ ఎంచుకున్నారు. బ్రిటన్‌ రాచకుటుంబ వివాహాల్లో వధువు చేయాల్సిన ప్రమాణానికి సంబంధించి రెండింటిలో దేన్నైనా ఎంచుకునే అవకాశం ఉంటుంది. డయానా కూడా శిరసావహిస్తాననే పదం లేని ప్రమాణాన్నే ఎంచుకొని తాను ఆధునిక భావాలున్న యువతినని అప్పట్లో చాటిచెప్పారు.

English summary

With Kate Middleton and Prince William marriage just a matter of few hours, every English citizen is looking forward to this big day with bated breath.