సింహం సింగిల్‌గా వస్తుంది, కడపలో కౌరవ సైన్యం!: అంబటి

By Srinivas

Published: Sunday, May 1, 2011, 16:36 [IST]

కడప: మాజీ పార్లమెంటు సభ్యుడు వైయస్ జగన్మోహన్ రెడ్డి అత్యధిక మెజార్టీతో కడప పార్లమెంటు నుండి గెలుపొందుతాడని వైయస్ఆర్ కాంగ్రెసు పార్టీ నేత అంబటి రాంబాబు ఆదివారం విలేకరుల సమావేశంలో మాట్లాడుతూ చెప్పారు. జగన్ అత్యధిక మెజార్టీతో గెలుపొందడం ఖాయమన్నారు. మెజార్టీ 13వ తారీఖున చూపిస్తామన్నారు. జగన్ వచ్చేది రెండు లక్షలా ఐదు లక్షలా అనేది తర్వాత తెలుస్తోందన్నారు. కానీ కాంగ్రెసు, టిడిపిలకు బుద్ది చెప్పే మెజార్టీ మాత్రం ఖాయమన్నారు. వారు మెజార్టీ తగ్గించడానికి ప్రయత్నాలు చేస్తున్నారు. కానీ గెలవడానికి కాదన్నారు. జగన్ గెలుస్తాడని చంద్రబాబుకు, కాంగ్రెసుకు తెలుసన్నారు.

చంద్రబాబు తన వైఖరి మార్చుకోవాలన్నారు. పులివెందులలో గందరగోళాన్ని సృష్టించేందుకు దాడులు వంటి నాటకాలు ఆడుతున్నారన్నారు. చంద్రబాబు ప్రజలను రెచ్చగొట్టే ప్రయత్నాలు చేస్తున్నారని అన్నారు. వారు ఓటమి చెందుతామని తెలిసి నిరాశతోనే అలాంటి ప్రయత్నాలు చేస్తున్నారన్నారు. జగన్‌ను ఎదుర్కొనడానికి కౌరవ సైన్యం చుట్టు ముడుతుందన్నారు. జగన్ అర్జునుడై తిరిగి వస్తాడని అన్నారు. జగన్ లాంటి సింహం బిడ్డను ఎదుర్కొడానికి గుంపులుగా వెళుతున్నారన్నారు.

Published On May 1, 2011