శాంతిభద్రతల రక్షణలో ప్రభుత్వం విఫలం: అక్బరుద్దీన్‌ను పరామర్శించిన బాబు

హైదరాబాద్: మూడు రోజుల క్రితం ప్రత్యర్థుల దాడిలో గాయపడి తృటిలో ప్రాణాపాయం తప్పించుకున్న ఎంఐఎం ఎమ్మెల్యే అక్బరుద్దీన్ ఓవైసీని తెలుగుదేశం పార్టీ అధ్యక్షుడు నారా చంద్రబాబునాయుడు పరామర్శించారు. సోమవారం కడప ఉప ఎన్నికల ప్రచారం ముగించుకొని హైదరాబాద్ వచ్చిన చంద్రబాబు మంగళవారం కేర్ ఆసుపత్రికి వెళ్లి పరామర్శించారు. అనంతరం ఆయన మీడియా ప్రతినిధులతో మాట్లాడారు. అక్బరుద్దీన్‌కు ప్రాణాపాయం ఏమీ లేదని వైద్యులు చెప్పారని అన్నారు. వెంటిలేషన్ తొలగించినట్లు చెప్పారు. అక్బర్ త్వరగా కోలుకోవాలని ఆయన కోరుకున్నారు. సాధారణ స్థితికి రావడానికి మరో నాలుగు అయిదు రోజులు పట్టవచ్చునని వైద్యులు చెప్పినట్లు తెలిపారు.

కాంగ్రెసు ప్రభుత్వం హయాంలో శాంతిభద్రతలు పూర్తిగా లేకుండా పోయాయన్నారు. ప్రభుత్వం లా అండ్ ఆర్డర్ రక్షించడంలో విఫలం చెందిందన్నారు. ఇలాంటి సంఘటనలు మరోసారి జరగకుండా చూడాలని సూచించారు. ప్రత్యర్థుల దాడి సమయంలో అప్రమత్తమై ఎదురు దాడికి దిగిన ఎమ్మెల్యే గన్‌మెన్లను చంద్రబాబు అభినందించారు. ఇలాంటి వారి పనితీరు ప్రభుత్వం గుర్తించాలని సూచించారు.

English summary

TDP president Chandrababu Naidu accused that congress government failed to protect law and order in state. He went to Care Hospitals and met MIM MLA Akbaruddin Owaisi.