జగన్.. నీకు పదవులు ఎక్కడి నుండి వచ్చాయి: షబ్బీర్ అలీ ప్రశ్న

By Srinivas

Published: Tuesday, May 3, 2011, 16:04 [IST]

కడప: మాజీ పార్లమెంటు సభ్యుడు వైయస్ జగన్మోహన్ రెడ్డి రాజకీయంగా ఈ స్థాయికి ఎదగడానికి కారణం కాంగ్రెసు పార్టీయే అనే విషయం గుర్తుంచుకోవాలని మాజీ మంత్రి షబ్బీర్ అలీ మంగళవారం ప్రొద్దుటూరు బహిరంగ సభలో అన్నారు. ప్రచారంలో భాగంగా ముఖ్యమంత్రి కిరణ్ కుమార్ రెడ్డితో పాటు ప్రొద్దుటూరు సభలో టిజి వెంకటేష్, షబ్బీర్ అలీ తదితర మంత్రులు, నేతలు పాల్గొన్నారు. ఈ సందర్భంగా వారు జగన్‌పై విమర్శలు గుప్పించారు. ఏఐసిసి అధ్యక్షురాలు సోనియాగాంధీ ఆమోదంతోనే దివంగత ముఖ్యమంత్రి వైయస్ రాజశేఖరరెడ్డి రాష్ట్రంలో సంక్షేమ పథకాలు ప్రవేశ పెట్టారని మంత్రి టిజి వెంకటేష్ అన్నారు. వైయస్ హయాంలోని సంక్షేమ పథకాలను కిరణ్ కుమార్ రెడ్డి తూచ తప్పకుండా కొనసాగిస్తున్నారని అన్నారు. వైయస్ హయాంలో ఉన్న వేల కోట్ల రూపాయల బకాయిలను కిరణ్ విడుదల చేశారని చెప్పారు.

జగన్ ఈ స్థాయికి ఎదగడానికి కారణమైన కాంగ్రెసుని విమర్శించడం శోచనీయమన్నారు. జగన్‌కు రాజకీయ ప్రాతినిధ్యం కల్పించిన సోనియాగాంధీని విమర్శించడం సరికాదన్నారు. ఆకాశం మీద ఉమ్మెస్తే అది మన మీదే పడుతుందని గుర్తుంచుకోవాలని అన్నారు. వైయస్ ఎప్పుడూ కాంగ్రెసును విమర్శించ లేదన్నారు. సంక్షేమ పథకాలకు రాజీవ్, ఇందిర పేర్లు పెట్టి వైయస్ ఆ కుటుంబంపై తనకు ఉన్న మక్కువను చూపించారన్నారు.

Published On May 3, 2011