లాడెన్ మృతితో బయటపడిన పాకిస్తాన్ దొంగ వైఖరి

న్యూఢిల్లీ: పాకిస్తాన్‌లోనే అత్యంత కీలకమైన అంతర్జాతీయ ఉగ్రవాది, ఆల్ ఖైదా వ్యవస్థాపకుడు హతం కావడంతో ఉగ్రవాదంపై ఆ దేశ వైఖరి తేటతెల్లమైంది. తమ భూభాగం నుంచి ఉగ్రవాద కార్యకలాపాలు సాగకుండా చూస్తామని, ఉగ్రవాదులపై మొక్కవోని పోరాటం చేస్తామని పాకిస్తాన్ చేసిన ప్రకటనలోని డొల్లతనం బయటపడింది. లాడెన్‌ను తమ బలగాలు ఇస్లామాబాద్ సమీపంలో హతమార్చామని అమెరికా అధ్యక్షుడు బరాక్ ఒబామా ప్రకటించిన తర్వాత పాకిస్తాన్ చిక్కుల్లో పడినట్లే చెప్పాలి.

ఉగ్రవాదంపై పోరులో పాకిస్తాన్ తమకు సహకరిస్తోందని ఒబామా చెప్పినప్పటికీ పాకిస్తాన్ వైఖరి మాత్రం బయటి ప్రపంచానికి తెలిసి వచ్చింది. లాడెన్ తమ దేశంలో లేడంటూ పాకిస్తాన్ బుకాయిస్తూ వచ్చింది. కానీ, తీరా అమెరికా లాడెన్‌ను తమ దేశంలోనే హతమార్చడం పాకిస్తాన్ నేతలకు మింగుడు పడి ఉండదు. లాడెన్ నివసిస్తున్న భవనం సమీపంలోని సైనిక పటాలాన్ని పాకిస్తాన్ ఆర్మీ చీఫ్ జనరల్ అష్ఫాక్ పర్వేజ్ కయానీ గత నెలలో సందర్శించాడు. ఇది పాకిస్తాన్‌ను మరింత ఇబ్బంది పెట్టే విషయం. తమ సైన్యం ఉగ్రవాదం వెన్ను విరిచిందని ఆ సమయంలో కయానీ ప్రకటించాడు కూడా. లాడెన్ స్థావరం గురించి పాకిస్తాన్ నేతలకు, సైనికాధికారులకు తెలుసుననే మాట వినిపిస్తోంది. ఐఎస్ఐ పాత్రపై కూడా అనుమానాలు వ్యక్తమవుతున్నాయి.

English summary

Pakistan’s often repeated bogey of being proactive in taking on al Qaeda and other terrorism emanating from its soil has blown in its face with the killing of Osama bin Laden.