ఎప్పుడూ వార్తల్లో ఉండాలనుకుంటాడు, లగడపాటి తీరు అంతే: ఎంపీ గుత్తా

By Srinivas

Published: Tuesday, May 10, 2011, 14:15 [IST]

హైదరాబాద్: విజయవాడ పార్లమెంటు సభ్యుడు లగడపాటి రాజగోపాల్ రెడ్డి ఎప్పుడూ వార్తల్లో ఉండాలని అనుకుంటారని కాంగ్రెసు పార్టీ ఎంపీ గుత్తా సుఖేందర్ రెడ్డి మంగళవారం విమర్శించారు. కడప, పులివెందులలో మాజీ పార్లమెంటు సభ్యుడు వైయస్ జగన్మోహన్ రెడ్డికి భారీ ఆధిక్యం వస్తుందని తన సర్వేలో తేలిందని లగడపాటి చెప్పడాన్ని ఆయన తీవ్రంగా ఖండించారు. పలువురు తెలంగాణ ఎస్ఐ అభ్యర్థులతో వెళ్లి ముఖ్యమంత్రిని కలిసి పరీక్షలు నిర్వహించాలని కోరడాన్ని కూడా ఆయన తప్పు పట్టినట్లుగా తెలుస్తోంది. ఆయన ఎప్పుడు ఏం మాట్లాడతారో ఆయనకే తెలియదన్నారు. ఎప్పుడూ వార్తల్లో ఉండాలని అనుకుంటారన్నారు. లగడపాటి తీరు ఒక సమస్యను సృష్టించి వార్తల్లో ఉండాలనుకునేలా ఉంటుందన్నారు.

ఫ్రీజోన్ అంశం తేలాకే ప్రభుత్వం ఎస్ఐ పరీక్షలు నిర్వహించాలని ఆయన డిమాండ్ చేశారు. 14 ఎఫ్ క్లాజ్ తొలగించకుండా పరీక్షలను నిర్వహిస్తే సరికాదన్నారు. అలా నిర్వహిస్తే తెలంగాణ అభ్యర్థులకు అన్యాయం జరిగినట్లేనని అన్నారు. ఆయన ఇదే విషయంపై ముఖ్యమంత్రిని కలిసి పరీక్షలు నిర్వహించరాదని కోరారు. అనంతరం ఆయన విలేకరులతో మాట్లాడారు. కాగా అంతకుముందు తెలంగాణ ఐక్య కార్యాచరణ సమితి కూడా 25వ తేది లోగా 14 ఎఫ్ నిబంధన తొలగించాలని డిమాండ్ చేసింది. ఆ లోపు తొలగించకుంటే ముఖ్యమంత్రి కిరణ్ కుమార్ రెడ్డి ఇంటిని ముట్టడిస్తామని హెచ్చరించారు.

Published On May 10, 2011