మాట తప్పిన వైయస్ వివేకా, మంత్రిగా విధులకు హాజరు

By Pratap

Published: Tuesday, May 10, 2011, 17:12 [IST]

హైదరాబాద్: ఉప ఎన్నికల్లో పులివెందుల శాసనసభ నియోజకవర్గం నుంచి కాంగ్రెసు అభ్యర్థిగా పోటీ చేసిన మంత్రి వైయస్ వివేకానంద రెడ్డి మాట తప్పారు. తాను శాసనసభ్యుడిగా ఎన్నికైతే తప్ప మంత్రి పదవి స్వీకరించబోనని పదే పదే చెబుతూ వచ్చిన ఆయన మంగళవారం మంత్రిగా విధులకు హాజరయ్యారు. ఎమ్మెల్సీగా పదవీ కాలం ముగియడంతో మంత్రి పదవికి రాజీనామా చేస్తున్నట్లు పులివెందుల ఉప ఎన్నికలకు ముందు వైయస్ వివేకానంద రెడ్డి చెప్పారు. మంత్రి పదవికి చేసిన రాజీనామాను ఆమోదించాలని ముఖ్యమంత్రి కిరణ్ కుమార్ రెడ్డిని ఆయన పదే పదే కోరారు. పులివెందుల నుంచి శాసనసభకు ఎన్నికైతేనే మంత్రి పదవి చేపడతానని చెప్పారు. కానీ అందుకు విరుద్ధంగా వ్యవహరించారు.

మంగళవారం ఉదయం ఆయన ముఖ్యమంత్రిని కలిశారు. వైయస్ వివేకానంద రెడ్డిని గవర్నర్ కోటాలో ఎమ్మెల్సీగా ఎంపిక చేసే అవకాశాలున్నాయి. స్థానిక సంస్థలు, ఎమ్మెల్యే కోటాల కింద ఎమ్మెల్సీ పూర్తయినప్పటికీ గవర్నర్ కోటా కింది ఎమ్మెల్సీ స్థానాలను ఇప్పటి వరకు భర్తీ చేయలేదు. వైయస్ వివేకానంద రెడ్డి కోసమే వాటిని భర్తీ చేయడం లేదని, పులివెందుల ఉప ఎన్నిక పూర్తయిన తర్వాత భర్తీ చేసి వివేకాకు స్థానం కల్పిస్తారని తెలుగుదేశం పార్టీ నాయకుడు గాలి ముద్దు కృష్ణమ నాయుడు చెబుతూ వచ్చారు. గాలి ముద్దు కృష్ణమనాయుడి మాటే నిజమవుతోంది.

Published On May 10, 2011