వైయస్ జగన్‌తో కలిసి పని చేసేది లేదు: వైయస్ వివేకానంద రెడ్డి

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్‌తో కలిసి పని చేసే ప్రసక్తి లేదని కాంగ్రెసు నాయకుడు వైయస్ వివేకానంద రెడ్డి చెప్పారు. ప్రజారాజ్యం పార్టీ అధ్యక్షుడు చిరంజీవి లాగా వైయస్ జగన్ భవిష్యత్తులో వైయస్సార్ కాంగ్రెసు పార్టీని కాంగ్రెసులో విలీనం చేస్తే కలిసి పని చేస్తానని ఆయన అన్నారు. తాను సాధారణ కార్యకర్తగానే సచివాలయానికి వచ్చినట్లు, మంత్రి పదవి చేపట్టేందుకు కాదని ఆయన స్పష్టం చేశారు. శాసనసభ్యుడిగా గెలవకపోతే తాను ఎమ్మెల్సీగా కొనసాగలేనని ఆయన చెప్పారు.

పులివెందుల ఉప ఎన్నికల్లో తమ వదిన వైయస్ విజయమ్మ గెలిస్తే సానుభూతితో గెలిచినట్లేనని ఆయన అన్నారు. ఎన్నికల ఫలితాలు ఎలా ఉండబోతున్నాయనే విషయంపై మాట్లడడానికి ఆయన నిరాకరించారు. పరీక్షలు రాసిన తర్వాత ఫలితాలు ఎలా ఉంటాయనే విషయాన్ని తాను చిన్నప్పటి నుంచి ఆలోచించేవాడిని కానని, సెలవులు తీసుకోవడమే అలవాటు అని ఆయన అన్నారు. దేవుడు ఎలా పెట్టి ఉంటే అలా జరుగుతుందని ఆయన ఫలితాలపై అన్నారు. తనకు రాజ్యసభ సీటు ఇస్తామనే హామీ అధిష్టానం నుంచి లేదని ఆయన చెప్పారు. ఆయన మాటలను బట్టి వివేకానంద రెడ్డి మంత్రిగా కొనసాగడానికి సిద్ధంగా లేరని అర్థమవుతోంది.

English summary

YS Vivekananda Reddy said that he will not work with YSR Congress party leader YS Jagan. He said that If Jagan merges his party in Congress, he will work with him.