మూడు నెలల్లోగా రాష్ట్ర ప్రభుత్వ కూలిపోతుంది: అంబటి రాంబాబు

By Pratap

Published: Friday, May 13, 2011, 12:52 [IST]

కడప: మూడు నెలల్లోగా ముఖ్యమంత్రి కిరణ్ కుమార్ రెడ్డి ప్రభుత్వం కూలిపోతుందని వైయస్సార్ కాంగ్రెసు పార్టీ నాయకుడు అంబటి రాంబాబు అన్నారు. ప్రజాబలం లేని ప్రభుత్వం మనుగడ సాగించలేదని ఆయన శుక్రవారం మీడియా ప్రతినిధులతో అన్నారు. కడప ఉప ఎన్నికల్లో వైయస్ జగన్‌కు ప్రజలు బ్రహ్మరథం పట్టారని ఆయన అన్నారు. రాష్ట్రవ్యాప్తంగా జగన్ ప్రభావం ఇదే విధంగా ఉంటుందని ఆయన అన్నారు. కడప ఉప ఎన్నిక ఫలితంతో మంత్రులు, శాసనసభ్యులు పునరాలోచనలో పడుతారని, మూడేళ్ల పాటు ప్రభుత్వం మనుగడ సాగించదని ఆయన అన్నారు. కాంగ్రెసులో ఉండడం వల్ల లాభం లేదని మంత్రులు, శాసనసభ్యులు గ్రహిస్తారని ఆయన అన్నారు.

కడప ఉప ఎన్నికల్లో జగన్‌ను ఓడించడానికి 16 మంది మంత్రులు, ముఖ్యమంత్రి కిరణ్ కుమార్ రెడ్డి, మాజీ ముఖ్యమంత్రి రోశయ్య, ముఖ్యమంత్రి పదవిని ఆశిస్తున్న చిరంజీవి దిగారని, వారు ఇప్పుడు తలలు ఎక్కడ పెట్టుకుంటారని ఆయన అన్నారు. వైయస్ జగన్ గెలవడని, మెజారిటీ రాదని కాంగ్రెసు నాయకులు అన్నారని ఆయన అన్నారు. కాంగ్రెసు, తెలుగుదేశం పార్టీలను రాష్ట్ర ప్రజలు విశ్వసించబోరని ఆయన అన్నారు.

Published On May 13, 2011