పశ్చిమ బెంగాల్ ముఖ్యమంత్రి బుద్ధదేవే భట్టాచార్య ఓటమి, రాజీనామా

By Pratap

Published: Friday, May 13, 2011, 16:39 [IST]

కోల్‌కత్తా: పశ్చిమ బెంగాల్ ముఖ్యమంత్రి బుద్ధదేవ్ భట్టాచార్య ఓడిపోయారు. జాదవ్ పూర్ నియోజకవర్గంలో ఆయన తన సమీప ప్రత్యర్థిపై ఓటమి పాలయ్యారు. పశ్చిమ బెంగాల్ శానససభకు జరిగిన ఎన్నికల ఓట్ల లెక్కింపు శుక్రవారం ఉదయం ప్రారంభమైంది. పశ్చిమ బెంగాల్ శాసనసభ ఎన్నికల్లో వామపక్షాలు తమ ఓటమిని అంగీకరించాయి. ముఖ్యమంత్రి పదవికి బుద్ధదేవ్ భట్టాచార్య రాజీనామా చేశారు. ఓటమి ఖాయమైన స్థితిలో బుద్ధదేవ్ భట్టాచార్య సిపిఎం సీనియర్ నాయకులతో సమావేశమయ్యారు. పశ్చిమ బెంగాల్‌లో ప్రజలు మార్పును కోరుకున్నారని సిపిఎం పోలిట్ బ్యూరో సభ్యుడు సీతారాం ఏచూరి అన్నారు. ఎన్నికల ఫలితాలను పోలిట్ బ్యూరో సమావేశంలో సమీక్షిస్తామని ఆయన చెప్పారు.

ఆర్థిక మంత్రి ఆసిమ్ దాస్ గుప్తా కూడా ఓటమి పాలయ్యారు. ఖర్జాహా స్థానంలో ఆయన ఓడిపోయారు. తృణమూల్ కాంగ్రెసు సొంతంగా ప్రభుత్వాని ఏర్పాటు చేసే మెజారిటీ దిశగా సాగుతోంది. తృణమూల్ కాంగ్రెసు 216 సీట్లలో ఆధిక్యంలో ఉంది. తృణమూల్ కాంగ్రెసు నేత మమతా బెనర్జీ సిపిఎం నాయకత్వంలోని వామపక్ష కూటమిని చావు దెబ్బ తీశారు. నందిగ్రాం, సింగూర్ ఉద్యమాలు మమతకు బాగా కలిసి వచ్చాయి. ఎర్రకోట పూర్తిగా బీటలు వారింది.

Published On May 13, 2011