గోనె సంచులు మీరివ్వకపోతే నేను ఇస్తా: ప్రభుత్వానికి చంద్రబాబు ఆఫర్

నల్గొండ: రాష్ట్రంలో అసమర్థ పాలన నడుస్తోందని తెలుగుదేశం పార్టీ అధ్యక్షుడు నారా చంద్రబాబునాయుడు ఆదివారం విమర్శించారు. మూడు రోజుల జిల్లా యాత్రలో భాగంగా చంద్రబాబు ఆదివారం నల్గొండ జిల్లాలో పలు గ్రామాలు సందర్శించి రైతులను పరామర్శించారు. ఈ సందర్భంగా ఆయన విలేకరులతో మాట్లాడారు. ముఖ్యమంత్రి కిరణ్ కుమార్ రెడ్డి ప్రభుత్వం చవట, దద్దమ్మలా వ్యవహరిస్తోందన్నారు. రైతుల పట్ల మంత్రుల తీరు కూడా బాగా లేదన్నారు. రైతుల సమస్యలపై కాంగ్రెసు ప్రభుత్వం నిర్లక్ష్యం వహిస్తుందన్నారు. అసమర్థ సిఎం వల్లనే రాష్ట్రంలో రైతుల పరిస్థితి అధ్వాన్నంగా తయారయిందన్నారు. మోసపూరిత కాంగ్రెసును మట్టుపెట్టాలని ఆయన ప్రజలకు పిలుపునిచ్చారు.

ప్రభుత్వం దళారుల పక్షపాతిగా వ్యవహరిస్తోందన్నారు. మిర్యాలగూడలో చంద్రబాబు సైకిల్ ర్యాలీలో పాల్గొన్నారు. రైతుల్లో ఐక్యత రావాలని కోరుకున్నారు. వారంతా సంఘటితం అయి ప్రభుత్వంపై పోరాడితే తప్ప రైతులకు న్యాయం జరిగేలా లేదన్నారు. రైతులకు గోనె సంచులు కూడా ప్రభుత్వం సకాలంలో ఇవ్వడం లేదని విమర్శించారు. రైతులకు ప్రభుత్వం గోనె సంచులను ఇవ్వలేక పోతే తాను సరఫరా చేసేందుకు సిద్ధంగా ఉన్నానని ప్రభుత్వానికి, రైతులకు బంపర్ ఆఫర్ ప్రకటించారు. రైతుల పట్ల ప్రభుత్వ వైఖరికి నిరసనగా 19న రహదాలు దిగ్బంధం ఉంటుందన్నారు. కాగా జిల్లాలో చంద్రబాబు పర్యటనను తెలంగాణ రాష్ట్ర సమితి కార్యకర్తలు అడ్డుకునే ప్రయత్నాలు చేశారు. చంద్రబాబు గో బ్యాక్ అంటూ నినాదాలు చేశారు. అయితే అక్కడే ఉన్న టిడిపి కార్యకర్తలు కూడా అందుకు ధీటుగా స్పందించారు. దీంతో పరిస్థితి ఉద్రిక్తంగా మారింది. పోలీసులు కలుగ జేసుకోవడంతో పరిస్థితి సద్దుమణిగింది.

English summary

TDP president Chandrababu Naidu offered Congress government to give rice bags. He blamed CM Kiran Kumar Reddy and his cabinet.