జయలలిత చుట్టూ అన్ని పార్టీల చక్కర్లు, స్టార్ అట్రాక్షన్ ఆమెనే

By Pratap

Published: Monday, May 16, 2011, 14:08 [IST]

చెన్నై‌: తమిళనాడు శాసనసభ ఎన్నికల్లో ఘన విజయం సాధించిన అన్నాడియంకె నేత జయలలిత చుట్టూ అన్ని పార్టీల నాయకులు తిరుగుతున్నారు. ఆమెను మంచి చేసుకునేందుకు తాపత్రయపడుతున్నారు. జాతీయ రాజకీయాల్లో జయలలిత మద్దతు అత్యంత ముఖ్యం కావడంతో ఆమెను దగ్గర చేసుకునేందుకు జాతీయ పార్టీల నాయకులు కూడా ప్రయత్నాలు సాగిస్తున్నారు. తమిళనాడు శాసనసభ ఎన్నికల్లో విజయం సాధించిన వెంటనే కాంగ్రెసు అధ్యక్షురాలు సోనియా గాంధీ ఆమెకు టీ పార్టీ ఇచ్చేందుకు సిద్ధపడ్డారు. తమ మిత్రుడైన డిఎంకె నేత కరుణానిధికి ఆగ్రహం తెప్పిస్తుందని తెలిసి కూడా సోనియా జయలలితను ఆహ్వానించారు. డిఎంకెను దూరం చేసుకుని అన్నాడియంకెతో దోస్తీ కట్టే భవిష్యత్తు వ్యూహంలో భాగంగానే సోనియా జయలలితను ఆహ్వానించినట్లు తెలుస్తోంది.

కాగా, వామపక్షాలు, తెలుగుదేశం తదితర పార్టీలతో కూడిన తృతీయ కూటమి నుంచి తప్పుకోకుండా చూసుకునేందుకు కూడా ప్రయత్నాలు జరుగుతున్నాయి. విజయం సాధించిన వెంటనే తెలుగుదేశం నాయకుడు చంద్రబాబు జయలలితకు ఫోన్ చేసి అభినందనలు తెలిపారు. సోమవారం జరిగిన జయ ప్రమాణ స్వీకారోత్సవానికి చంద్రబాబు సహా సిపిఐ ప్రధాన కార్యదర్శి ఎబి బర్దన్ హాజరయ్యారు.

బిజెపి నాయకులు కూడా ఎటు పోయి ఎటు వస్తుందో అనే ఉద్దేశంతో జయలలితతో స్నేహ సంబంధాలను నెరపడానికి ప్రయత్నిస్తున్నారు. జయలలిత ప్రమాణ స్వీకారోత్సవానికి గుజరాత్ ముఖ్యమంత్రి, బిజెపి నాయకుడు నరేంద్ర మోడీ హాజరయ్యారు. మొత్తం మీద, జాతీయ రాజకీయాల్లో జయలలిత ప్రధాన పోషించే అవకాశాలున్నాయి.

Published On May 16, 2011