తుపాకీతో బెదిరించి ఇండికా కారు చోరీ: శిల్పారామం వద్ద ఘటన

By Srinivas

Published: Monday, May 16, 2011, 16:46 [IST]

హైదరాబాద్: కారు డ్రైవర్‌ను తుపాకీతో బెదిరించి కారు ఎత్తుకు పోయిన సంఘటన హైదరాబాదు మాదాపూర్‌లోని శిల్పారామం వద్ద చోటు చేసుకుంది. ఇండికా కారులో ప్రయాణీకులను ఎక్కించుకొని శిల్పారామం వద్ద శివ అనే డ్రైవర్ దించాడు. అనంతరం ఆయన కారు పక్కనే నిల్చున్నాడు. అంతలో నలుగురు అగంతకులు వచ్చి డ్రైవర్‌కు తుపాకీ చూపించి ఇండికా కారును ఎక్కించారు. వారు నలుగురూ అందులో ఎక్కారు. అనంతరం డ్రైవర్‌ను మియాపూర్ దగ్గర దింపేసి కారును ఎత్తుకు వెళ్లారు. దీంతో డ్రైవర్ మాదాపూర్ పోలీస్ స్టేషన్‌లో ఫిర్యాదు చేశారు. పోలీసులు కేసు నమోదు చేసుకొని దర్యాఫ్తు చేస్తున్నారు.

కాగా గతంలో ఇదే ప్రాంతంలో ఇదే తరహాలో రెండు దొంగతనాలు జరిగాయి. దీంతో పోలీసులు ఒకే వర్గం ఈ దొంగతనాలకు పాల్పడుతున్నట్లుగా అనుమానిస్తున్నారు. గతంలో ఓ వైన్ దుకాణం యజమాని లక్ష రూపాయలు తీసుకు వెళుతుండగా తుపాకీతో బెదిరించి ఆ డబ్బును ఎత్తుకెళ్లారు. మరోసారి డ్రైవర్‌ను బెదిరించి ఇలాగే ఇండికా కారు ఎత్తుకెళ్లారు. ఒకే ప్రాంతంలో ఒకే తరహాలో దొంగతనాలు జరుగుతుండటంతో స్థానికులలో కలకలం రేగింది.

Published On May 16, 2011