అందరం అసంతృప్తిగానే ఉన్నాం: సిఎంపై ఆజాద్‌కు కుతూహలమ్మ ఫిర్యాదు

By Srinivas

Published: Tuesday, May 17, 2011, 15:51 [IST]

హైదరాబాద్: కేంద్రమంత్రి, రాష్ట్ర వ్యవహారాల పరిశీలకుడు గులాం నబీ ఆజాద్‌కు ముఖ్యమంత్రి కిరణ్ కుమార్ రెడ్డిపై ఫిర్యాదుల వెల్లువలు వచ్చి చేరుతున్నాయి. చిత్తూరు జిల్లాకు చెందిన ఎమ్మెల్యే కుతూహలమ్మ మంగళవారం సిఎం కిరణ్ కుమార్ రెడ్డిపై ఆజాద్‌కు ఫిర్యాదు చేసింది. చిత్తూరు జిల్లా ఎమ్మెల్యేలు ఐదుగురు కిరణ్ పై అసంతృప్తితో ఉన్నారని చెప్పారు. తమ పనులను చేయవద్దని ముఖ్యమంత్రి అధికారులకు ఆదేశాలు జారీ చేస్తున్నాడని చెప్పారు. తనకు కేబినెట్‌లో అవకాశం ఇవ్వాలని ఆమె కోరారు. మల్లు భట్టి విక్రమార్క సారధ్యంలో ఎస్సీ, ఎస్టీ ఎమ్మెల్యేలు గులాం నబీ ఆజాద్‌ను కలిశారు.

ఈ సందర్భంగా ఎస్సీ, ఎస్టీ ఎమ్మెల్యేలు గిరిజన ప్రాంతాల్లో మైనింగ్ లీజులు బడా కంపెనీలకు రద్దు చేయాలని ఆజాద్‌ను కోరారు. గనులను వెంటనే వెనక్కి తీసుకొని రాష్ట్ర ఆస్తిగా ప్రకటించాలని కోరారు. గిరిజన సమాఖ్యల ద్వారా మైనింగ్ పనులు చేపట్టాలని ఎమ్మెల్యేలు కోరారు. ఎస్సీ, ఎస్టీలకు ఇందిరమ్మ ఇళ్లకు ఇస్తున్న నిధులను లక్షకు పెంచాలని కోరారు. ఎస్సీ, ఎస్టీ ప్లాన్ నిధులు నూటికి నూరుశాతం ఖర్చు చేయాలని కోరారు.

Published On May 17, 2011