తెలంగాణ అంశాన్ని పార్టీ హై కమాండ్ చూసుకుంటుంది: ఆజాద్

By Pratap

Published: Wednesday, May 18, 2011, 8:38 [IST]

హైదరాబాద్: రెండు రోజుల రాష్ట్ర పర్యటనకు వచ్చిన కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్‌కు తెలంగాణ సెగ బాగానే తాకింది. తెలంగాణకు అనుకూలంగా నిర్ణయం తీసుకోవాలని కాంగ్రెసు తెలంగాణ ప్రాంత నాయకులు కోరగా, తెలంగాణ సమస్యను వెంటనే పరిష్కరిస్తూ రాష్ట్రాన్ని సమైక్యంగా ఉంచాలని సీమాంధ్ర నాయకులు విజ్ఞప్తి చేశారు. అయితే, తెలంగాణ అంశాన్ని పార్టీ అధిష్టానం చూసకుంటుందని, పార్టీని ఎలా చక్కదిద్దాలో చెప్పాలని ఆజాద్ వారితో చెప్పారు. పార్టీని బలోపేతం చేయడం, ప్రభుత్వాన్ని ప్రజలకు చేరువ చేయడం అనే అంశాలపైనే ఆజాద్ ప్రధానంగా దృష్టి సారించినట్లు కనిపిస్తోంది.

ఆజాద్ తీరు చూస్తుంటే తెలంగాణపై అధిష్టానం త్వరలోనే తెలంగాణపై ఓ నిర్ణయానికి వచ్చే అవకాశం ఉన్నట్లు తెలుస్తోంది. తెలంగాణ ఇవ్వడం వల్ల సంభవించే పరిణామాలపై, ఇవ్వకపోతే కలిగే పరిణామాలపై కూడా ఆయన ఆలోచన చేసినట్లు చెబుతున్నారు. పార్టీ పనితీరు ఎలా ఉంది, ప్రభుత్వం ఎలా పనిచేస్తోంది అనే విషయాలపై ఆయన దృష్టి సారించారు. రెండు రోజుల రాష్ట్ర పర్యటనను ముగించుకుని ఆయన మంగళవారం సాయంత్రం ఢిల్లీకి వెళ్లిపోయారు. రాష్ట్రంలో పార్టీ బలంగానే ఉందని ఆయన మీడియా ప్రతినిధులతో అన్నారు.

Published On May 18, 2011