పార్టీ జెండాతోనే ఏ ఆందోళన అయినా: నాగంకు చంద్రబాబు వార్నింగ్!

By Srinivas

Published: Wednesday, May 18, 2011, 15:33 [IST]

హైదరాబాద్: పార్టీ జెండాలు లేకుండా తెలంగాణ నగారా నిర్వహిస్తామని కుండబద్దలు కొట్టిన తెలుగుదేశం పార్టీ సీనియర్ ఎమ్మెల్యేలు నాగం జనార్ధన్ రెడ్డి, హరీశ్వర్ రెడ్డిలకు ఆ పార్టీ అధ్యక్షుడు చంద్రబాబునాయుడు పరోక్షంగా హెచ్చరికలు జారీ చేశారు. పార్టీ జెండా లేకుండా ఆందోళనలు చేసే నేతలపై చర్యలు తీసుకునే విషయం ఆలోచిస్తామని ఆయన బుధవారం పార్టీ కార్యాలయంలో ఏర్పాటు చేసిన విలేకరుల సమావేశంలో స్పష్టం చేశారు. ప్రత్యేక తెలంగాణ కోసం ఏ కార్యక్రమం చేసినా పార్టీ జెండా ఉండాల్సిందేనని చెప్పారు. తెలంగాణ ఏర్పాటుపై పార్టీ వైఖరి ఇదివరకే తెలియజేశామని చెప్పారు.

రాష్ట్ర విభజనమై కేంద్రం త్వరగా నిర్ణయం తీసుకోవాలని ఆయన డిమాండ్ చేశారు. రాష్ట్రంలో అధికార కాంగ్రెసు ప్రభుత్వం చేపడుతున్నవి రైతు చైతన్య యాత్రలు కాదన్నారు. అవి రైతు తిరుగుబాటు యాత్రలు అవుతాయన్నారు. మహానాడులో తెలంగాణకు అనుకూలంగా తీర్మానం చేయాల్సిన అవసరం లేదని బాబు అభిప్రాయపడ్డారు.

Published On May 18, 2011