జగన్‌ది బలుపు, 6 నెలల్లో కాంగ్రెసు పరిస్థితి మారుతుంది: శంకర్‌ రావు

By Srinivas

Published: Wednesday, May 18, 2011, 16:33 [IST]

హైదరాబాద్: కడప, పులివెందుల ఉప ఎన్నికలలో తన గెలుపును వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి గెలుపు అనుకుంటున్నాడని కానీ అది గెలుపు కాదని బలుపు అని మంత్రి శంకర్ రావు బుధవారం విమర్శించారు. జగన్ ముఖ్యమంత్రి కావాలని ఎవరైతే సంతకాలు చేయించారో ఆ మంత్రులే కాంగ్రెసు పార్టీ తరఫున ప్రచారంలో పాల్గొనడం వల్ల పార్టీ అభ్యర్థులు ఓడిపోయారన్నారు. లేదంటే గెలుపు అవకాశం కాంగ్రెసుకే ఉందన్నారు.

జగన్ స్వతంత్ర అభ్యర్థిగా గెలుపొందాడని, ఆయన పార్టీకి ఇంకా గుర్తు రాలేదన్నారు. కడప ఉప ఎన్నికలలో ఓడి పోవడంతో కాంగ్రెసు పార్టీ కార్యకర్తలు ఎవరూ నిరుత్సాహ పడకూడదని సూచించారు. రాష్ట్ర రాజకీయాల్లో ఆరు నెలల్లో కాంగ్రెసు పార్టీ రాజకీయమే మారిపోతుందన్నారు. పార్టీ మరింత బలపడుతుందన్నారు. కాంగ్రెసు పార్టీ జాతికి దేవుడిచ్చిన వరం అన్నారు. కాంగ్రెసు పరిస్థితి మారకుంటే తాను రాజకీయాల్లో తప్పుకునేందుకు కూడా సిద్ధం అని చెప్పారు.

Published On May 18, 2011