వైయస్ జగన్‌ది చంద్రబాబు వైఖరే, తెలంగాణపై ఇద్దరూ ఏకం

By Pratap

Published: Thursday, May 19, 2011, 18:27 [IST]

హైదరాబాద్: తెలంగాణపై వైయస్సార్ కాంగ్రెసు పార్టీ అధ్యక్షుడు వైయస్ జగన్ స్పష్టమైన వైఖరి తీసుకునే అవకాశాలు లేవు. ఆయన స్పష్టంగా తెలంగాణకు అనుకూలంగా వైఖరి తీసుకుంటారని ఇటీవల వచ్చిన వార్తలు అబద్ధాలేనని తెలిసోతోంది. తెలుగుదేశం పార్టీ అధ్యక్షుడు నారా చంద్రబాబు నాయుడు తీసుకున్న వైఖరినే ఆయన అనుసరించే అవకాశాలున్నాయి. వైయస్సార్ కాంగ్రెసు పార్టీ నాయకుడు గోనె ప్రకాశ రావు గురువారం చేసిన ప్రకటన ఈ విషయాన్ని తెలియజేస్తోంది. తెలంగాణకు చంద్రబాబు, వైయస్ జగన్ అడ్డు కారని ఆయన చెప్పారు. తెలంగాణపై ఆయన కేంద్ర వైఖరిని తప్పు పట్టారు.

గోనె ప్రకాశ రావు ప్రకటనను బట్టి వైయస్ జగన్ తెలంగాణపై రెండు కళ్ల సిద్ధాంతాన్నే ఆనుసరించే అవకాశాలున్నాయని తెలుస్తోంది. తనకు రెండు ప్రాంతాలు రెండు కళ్లు అంటూ చంద్రబాబు రెండు కళ్ల సిద్ధాంతాన్ని అనుసరిస్తున్నారు. తెలంగాణపై ఆయన కాంగ్రెసు వైఖరిని తప్పు పడుతున్నారు. తెలంగాణను ఇచ్చేది తెచ్చేది తాము కాదని వైయస్ జగన్ చెప్పే అవకాశాలున్నాయి. అసలు జగన్ తెలంగాణపై మాట్లాడుతారా అనేది కూడా అనుమానమే. వైయస్సార్ కాంగ్రెసు నాయకులు మాత్రమే జగన్ తెలంగాణకు వ్యతిరేకం కాదంటూ ఊదరగొడుతున్నారు. కట్టె విరగకుండా పాము చావకుండా జగన్ వైఖరి ఉంటుందని చెప్పవచ్చు. అన్ని విషయాల్లో చంద్రబాబుపై కత్తులు నూరుతున్న వైయస్సార్ కాంగ్రెసు నాయకులు తెలంగాణ విషయంలో మాత్రం ఆయనను సమర్థిస్తున్నారు.

Published On May 19, 2011