నాగంపై చర్యలకు తెలుగుదేశం రెడీ: బాబుకు ఫిర్యాదు చేయాలని నిర్ణయం

By Srinivas

Published: Sunday, May 22, 2011, 15:32 [IST]

హైదరాబాద్: తెలుగుదేశం పార్టీ సీనియర్ శాసనసభ్యుడు నాగం జనార్ధన్ రెడ్డిపై చర్యలు తీసుకునేందుకు తెలుగుదేశం పార్టీ దాదాపు సమాయత్తమయినట్లుగా తెలుస్తోంది. మహబూబ్‌నగర్ జిల్లాలోని నాగర్ కర్నూల్ సభ తర్వాత నాగం జనార్దన్ రెడ్డి వ్యాఖ్యలలో పార్టీపై, పార్టీ అధినేతపై మరింత పదునెక్కినట్లుగా వారు భావిస్తున్నారు. తెలంగాణపై స్పష్టమైన నిర్ణయం తెలిపే వరకు పార్టీ జెండాపై తెలంగాణ ఉద్యమం చేసేది లేదని నాగం స్పష్టం చేసిన నేపథ్యంలో ఆయనపై చర్యల విషయమై చర్చించేందుకు ఆదివారం ఎన్టీఆర్ ట్రస్టు భవన్‌లో తెలంగాణ టిడిపి ఫోరం నేతలు పాల్గొన్నారు.

వారు నాగంపై రాతపూర్వకంగా పార్టీ అధినేత చంద్రబాబుకు ఫిర్యాదు చేయాలని సమావేశంలో కూడా నిర్ణయించారు. ఆదివారం మధ్యాహ్నం టిడిపి ఎమ్మెల్యే రేవంత్ రెడ్డి కూడా నాగంపై తీవ్రస్థాయిలో ధ్వజమెత్తారు. తెలంగాణ ఉద్యమంలో పాల్గొంటున్నందునే చర్యలు తీసుకున్నారన్న పేరు వస్తుందన్న నెగిటివ్ భావన ప్రజల్లో ఏర్పడుతుందన్న ఉద్దేశ్యంతో ఇన్నాళ్లూ ఆగిన టిడిపి శనివారం పరిగిలో జరిగిన సభలో, సభకు ముందు నాగం మాట్లాడిన వ్యాఖ్యల కారణంగా తీవ్ర ఆగ్రహంగా ఉన్నట్లుగా తెలుస్తోంది. ఆయన సభలో టిడిపి అధినేత, పార్టీపై తీవ్ర వ్యాఖ్యలు చేసినందువల్ల చర్యలు తీసుకునే విషయంపై దాదాపుగా ఖరారయినట్లుగా తెలుస్తోంది. ఇప్పటికే సీమాంధ్ర నేతలు నాగంపై చర్యలు తీసుకోవాలని డిమాండ్ చేస్తున్న విషయం తెలిసిందే.

Published On May 22, 2011