వెయిట్ చేశాం, ఇక అధిష్టానంతో తెల్చుకుంటాం: తెలంగాణపై కెకె

By Srinivas

Published: Monday, May 23, 2011, 17:12 [IST]

న్యూఢిల్లీ: ప్రత్యేక తెలంగాణ రాష్ట్రం విషయంలో కేంద్రం కొన్నాళ్లు వెయిట్ చేయమని చెబితే చేశామని ఇక తేల్చుకుంటామని కాంగ్రెసు పార్టీ సీనియర్ నాయకుడు కె కేశవరావు సోమవారం అన్నారు. ఎన్నికలకు ముందు తాము తెలంగాణ డిమాండ్‌తో అధిష్టానం వద్దకు వెళితే ఐదు రాష్ట్రాల ఎన్నికలు ఉన్నాయని అవి పూర్తయ్యే వరకు తెలంగాణపై ఏ నిర్ణయం తీసుకోలేమని అప్పటి వరకు ఆగాలని సూచించిందని చెప్పారు. అధిష్టానం చెప్పినట్టే ఐదు రాష్ట్రాల ఎన్నికలు పూర్తయ్యే వరకు తాము ఆగామని ఇక ఆగేది లేదని అన్నారు. ఎన్నికలు పూర్తయి ఫలితాలు కూడా వచ్చినందున తెలంగాణపై కేంద్రం ఆలోచన ఏమిటో తెల్సుకుంటామని అన్నారు.

పార్టీ ప్రయోజనాల దృష్ట్యా మూడు నెలలు ఆగామని అన్నారు. కాగా ప్రత్యేక తెలంగాణ విషయంపై కేంద్ర హోంమంత్రికి కలిసే నిమిత్తం కేశవరావు సాయంత్రం నిర్వహించనున్న ప్రెస్ మీట్ వాయిదా వేసుకున్నారు. కెకెతో పాటు పలువురు ఎంపీలు రాత్రి పదిన్నర గంటలకు చిదంబరంను కలవనున్నారు.

Published On May 23, 2011