వివాదం లేకుండానే పరీక్షలు నిర్వహించాలని ప్రభుత్వం యోచన

By Srinivas

Published: Monday, May 23, 2011, 16:15 [IST]

హైదరాబాద్: ఎలాంటి వివాదం లేకుండా ఎస్సై పరీక్షలు నిర్వహించాలనే యోచనలో రాష్ట్ర ప్రభుత్వం ఉన్నట్లుగా తెలుస్తోంది. హైదరాబాద్ ఫ్రీజోన్ అంశం తేల్చిన తర్వాతే ఎస్సై పరీక్షలు నిర్వహించాలని రాష్ట్ర సర్కారు భావిస్తున్నట్టుగా కనిపిస్తోంది. ఆదివారం కేంద్రమంత్రి చిదంబరంను కలిసిన ముఖ్యమంత్రి కిరణ్ కుమార్ రెడ్డి ఫ్రీజోన్ అంశం త్వరగా తేల్చాలని కోరినట్లుగా తెలుస్తోంది. ఫ్రీజోన్ అంశం తేల్చకుండా పరీక్షలు నిర్వహించడం కష్టమని చెప్పినట్లుగా తెలుస్తోంది. సోమవారం హోమంత్రి సబితా ఇంద్రారెడ్డి కూడా అదే అంశాన్ని ప్రస్తావించారు. 14ఎఫ్ క్లాజ్ విషయం, ఫ్రీజోన్ అంశం తేలకుండా పరీక్షలు నిర్వహించలేమని ఆమె చెప్పారు. ఆ సమస్య తొలగిస్తేనే పరీక్షలు సక్రమంగా నిర్వహించగలమని ఆమె అభిప్రాయపడ్డారు.

కాగా ఆరునెలల క్రితం ఎస్సై పరీక్షలు నిర్వహించాలని చూసినప్పుడు తెలంగాణ వ్యాప్తంగా అందరూ హైదరాబాద్ ఫ్రీజోన్ అంశం తేలే వరకు పరీక్షలు నిర్వహించరాదని తెలంగాణవాదులు డిమాండ్ చేశారు. ఇలా పరీక్షలు నిర్వహించాలనుకున్నప్పుడల్లా వద్దని డిమాండ్లు రావడం పట్ల ప్రభుత్వం తీవ్ర అసంతృప్తి వ్యక్తం చేస్తున్నట్లుగా తెలుస్తోంది. హైదరాబాద్ ఫ్రీజోన్ నుండి ఆరో జోన్‌గా మార్చి ఎలాంటి వివాదం లేకుండా పరీక్షలు నిర్వహిస్తే సరిపోతుందని రాష్ట్ర ప్రభుత్వం భావించడం వల్లనే కేంద్రమంత్రిని అంశంపై తేల్చమని కోరినట్లుగా తెలుస్తోంది.

Published On May 23, 2011