చంద్రబాబు సమైక్యవాది అని తేలిపోయింది, ఎస్సార్సీకి భయపడం: గద్దర్

By Srinivas

Published: Tuesday, May 24, 2011, 12:29 [IST]

హైదరాబాద్: తెలుగుదేశం పార్టీ అధినేత నారా చంద్రబాబునాయుడు సమైక్యవాది అని మరోసారి తేలిపోయిందని తెలంగాణ ప్రజా ఫ్రంట్ చైర్మన్, ప్రజా గాయకుడు గద్దర్ మంగళవారం అన్నారు. చంద్రబాబు సమైక్యవాది అయినందున తెలుగుదేశం పార్టీ ప్రత్యేక తెలంగాణ రాష్ట్రానికి అనుకూలంగా పని చేస్తుందని అనుకోలేమన్నారు. తెలుగుదేశం పార్టీలో ఉంటూ తెలంగాణ కోసం ఉద్యమం చేస్తున్నామంటే ప్రజలు విశ్వసించే పరిస్థితి లేదన్నారు. టిడిపి నుండి బయటకు వచ్చి ఉద్యమాన్ని చేపట్టాలని సూచించారు.

తెలంగాణపై కాంగ్రెసు పార్టీ పిల్లి మొగ్గలు వేస్తుందన్నారు. కాంగ్రెసును నమ్మే పరిస్థితుల్లో ప్రజలు లేరన్నారు. తెలంగాణపై ఎన్ని ఎస్సార్సీలు వేసిన భయపడేది లేదన్నారు. ప్రత్యేక తెలంగాణ రాష్ట్ర వాదన అరవయ్యేళ్ల నుండి ఉందని దానికి ఎస్సార్సీతో పని లేదన్నారు. తెలంగాణ రాష్ట్రం తప్పకుండా వస్తుందన్నారు. తెలంగాణను ఎవరూ కూడా అడ్డుకోలేరన్నారు. తెలంగాణ జెఏసితో అంశాల ప్రాతిపదికన కలిసి పని చేస్తామని అన్నారు.

Published On May 24, 2011