చంద్రబాబుకు షాక్ టిడిపికి గోరంట్ల బుచ్చయ్య చౌదరీ గుడ్ బై!

హైదరాబాద్: తెలుగుదేశం పార్టీ అధినేత నారా చంద్రబాబునాయుడుకు షాక్ తగలనుంది. పార్టీ ఆవిర్భావం నుండి పార్టీ ఎదుగుదలలో ప్రముఖ పాత్ర వహిస్తూ వస్తున్న ఆ పార్టీ సీనియర్ నాయకుడు గోరంట్ల బుచ్చయ్య చౌదరి టిడిపికి రాజీనామా చేయనున్నట్లు కథనాలు వినిపిస్తున్నాయి. పార్టీ ఆవిర్భావం నుండి నేటి వరకు పార్టీ కార్యక్రమాలలో చురుగ్గా పాల్గొంటున్న తనకు అధిష్టానం సరియైన ప్రాధాన్యత ఇవ్వడం లేదని ఆయన ఆవేదన చెంది రాజీనామాకు సిద్ధపడుతున్నట్లుగా తెలుస్తోంది. పార్టీలో సీనియర్లకు ప్రాధాన్యం లేదని ఆయన పలువురుతో ఆవేదన వ్యక్తం చేసినట్టుగా తెలుస్తోంది. పార్టీ స్థానిక నాయకులలో సీనియర్లపై ఏమాత్రం గౌరవం లేదని ఆయన అన్నట్లుగా తెలుస్తోంది.

రాజమండ్రి మేయర్ అవిశ్వాస తీర్మానం విషయంలో కూడా ఆయన అలక చెందినట్లుగా తెలుస్తోంది. పార్టీలో ప్రస్తుతం డబ్బులు ఉన్న వారికి, కొత్త వారికే ప్రాధాన్యత ఇస్తున్నారని కూడా ఆయన అన్నట్లుగా తెలుస్తోంది. చంద్రబాబు కూడా పార్టీ పరిస్థితిపై దృష్టి సారించలేని స్థితి నెలకొన్నదని ఆయన ఆవేదన చెందినట్లుగా తెలుస్తోంది. చంద్రబాబు చుట్టూ కోటరీ ఉందని ఆ కోటరి చెప్పినట్టుగానే ఆయన నడుచుకోవడం వల్ల పార్టీ నష్ట పోయే పరిస్థితి తలెత్తుతోందని ఉద్దేశ్యంలో ఆయన ఉన్నట్లుగా తెలుస్తోంది.

తెలుగుదేశం పార్టీని వీడి వైయస్ జగన్మోహన్ రెడ్డి స్థాపించిన వైయస్ఆర్ కాంగ్రెసు పార్టీలో తాను ఎట్టి పరిస్థితుల్లో చేరేది లేదని చెప్పినట్లుగా కూడా తెలుస్తోంది. ఒకవేళ తాను టిడిపికి రాజీనామా చేయాల్సి వస్తే రాజకీయాలకు దూరంగా ఉంటాను కానీ జగన్‌తో మాత్రం వెళ్లే ప్రసక్తి లేదని మాత్రం ఆయన ఖరాఖండిగా చెప్పినట్లు తెలుస్తోంది. అయితే ఆయన కేవలం పదవికి మాత్రమే రాజీనామా చేసి సమస్యను బాబు దృష్టికి తీసుకు వెళతారని, పార్టీకి రాజీనామా చేయరనే వాదనలు కూడా వినిపిస్తున్నాయి.

English summary

Gorantla Buchaiah Chowdary may resign for Telugudesam party soon. He is very disappointed with Party.