నాగం జనార్దన్ రెడ్డి వెంట ఎవరెవరు ఉంటారు, ఏం చేస్తారు?

హైదరాబాద్: తెలుగుదేశం పార్టీ నుంచి సీనియర్ శానససభ్యుడు నాగం జనార్దన్ రెడ్డిని పంపించడం ఖాయంగా కనిపిస్తోంది. నాగం జనార్దన్ రెడ్డిని సస్పెండ్ చేయాలని తెలుగుదేశం తెలంగాణ ఫోరం చేసిన సిఫార్సును పార్టీ అధ్యక్షుడు నారా చంద్రబాబు నాయుడు ఆమోదిస్తారనే ప్రచారం జరుగుతోంది. ప్రస్తుతం ఢిల్లీ ఉన్న ఆయన హైదరాబాదుకు రాగానే దీనిపై దృష్టి పెడతారని అంటున్నారు. ఈ స్థితిలో నాగం జనార్దన్ రెడ్డి ఎవరెవరు వెళ్తారు, ఆయన ఏం చేస్తారు అనేది చర్చనీయాంశంగా మారింది. పరిగి శాసనసభ్యుడు హరీశ్వర్ రెడ్డి తాను నాగం జనార్దన్ రెడ్డి వెంట ఉంటానని ఇప్పటికే ప్రకటించారు.

ఆదిలాబాద్ జిల్లాకు చెందిన వేణుగోపాలాచారి, జోగు రామన్నలు కూడా నాగం జనార్దన్ రెడ్డి వెంట నడిచే అవకాశాలున్నాయి. తెలుగుదేశం ద్వతీయ, కిందిస్థాయి నాయకులు కూడా ఆయన వెంట నడిచే అవకాశాలు లేకపోలేదని అంటున్నారు. తెలంగాణ ప్రజా సంఘాలు కూడా నాగం జనార్దన్ రెడ్డికి మద్దతుగా నిలుస్తున్నాయి. ఇప్పటికే ఉస్మానియా విశ్వవిద్యాలయం జెఎసి నాగం జనార్దన్ రెడ్డికి మద్దతు ప్రకటించింది. పైగా, తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు పట్ల అసంతృప్తిగా ఉన్న వర్గాలు, సంఘాలు, తెలంగాణ ఉద్యమానికి దూరం జరిగిన శక్తులు నాగం జనార్దన్ రెడ్డికి మద్దతు ప్రకటించే అవకాశాలున్నాయి.

English summary

There is a debate that who will support TDP MLA Nagam Janardhan Reddy on Telangana issue.