వర్మకు పోలీసు షాక్, బెజవాడ రౌడీలు షూటింగ్‌కు అనుమతి రద్దు

By Pratap

Published: Wednesday, May 25, 2011, 12:26 [IST]

విజయవాడ‌: దర్శక నిర్మాత రామ్ గోపాల్ వర్మకు విజయవాడ పోలీసులు షాక్ ఇచ్చారు. బెజవాడ రౌడీలు సినిమా షూటింగుకు విజయవాడలో అనుమతి రద్దు చేశారు. దీంతో షూటింగుకు బ్రేకులు పడ్డాయి. న్యాయవాదులు అభ్యంతర పెట్టడంతో సినిమా షూటింగుకు పోలీసులు అనుమతి రద్దు చేశారు. తమకు స్క్రిప్టు ఇస్తే, న్యాయ నిపుణుల సలహా తీసుకుని షూటింగుకు అనుమతి ఇచ్చే విషయంపై ఆలోచన చేస్తామని విజయవాడ పోలీసు కమిషనర్ చెప్పారు. అయితే, స్క్రిప్టు ఇవ్వడం సాంకేతికంగా సాధ్యం కాదని యూనిట్ సభ్యులు చెప్పారు.

శాంతిభద్రతలకు విఘాతం కలగదని స్క్రిప్టు చదివిన న్యాయ నిపుణులు చెప్తే షూటింగుకు అనుమతి ఇస్తామని పోలీసులు చెప్పారు. ఏయే సన్నివేశాలు ఎక్కడెక్కడ చిత్రీకరిస్తానే విషయాలు తెలియజేయాలని కూడా కమిషనర్ సూచించారు. స్క్రిప్టును ఎప్పటికప్పుడు మార్చుకుంటూ వస్తామని, అందువల్ల స్క్రిప్టు ఇవ్వడం సాధ్యం కాదని సినిమా యూనిట్ అంటోంది. బెజవాడ రౌడీలు సినిమా టైటిల్‌పైనే మొదటి నుంచీ అభ్యంతరాలు వ్యక్తమవుతున్నాయి. బెజవాడ రౌడీలు సినిమా షూటింగు వల్ల శాంతిభద్రతలకు విఘాతం కలిగే ప్రమాదం ఉందని, అందువల్ల సినిమా షూటింగు రద్దు చేయాలని న్యాయవాదులు సిపితో చెప్పారు.

Published On May 25, 2011