నేను నాగం వెంటే ఉంటాను: తెలుగుదేశం శాసనసభ్యుడు జోగు రామన్న

హైదరాబాద్: తాను పార్టీ సస్పెండ్ అయిన నాగం జనార్దన్ రెడ్డి వెంటే ఉంటానని ఆదిలాబాద్ జిల్లాకు చెందిన తెలుగుదేశం శాసనసభ్యుడు జోగు రామన్న చెప్పారు. ఆయన గురువారం నాగం జనార్దన్ రెడ్డితో సమావేశమయ్యారు. సమావేశానంతరం ఆయన మీడియా ప్రతినిధులతో మాట్లాడారు. నాగం జనార్దన్ రెడ్డిని సస్పెండ్ చేయడం తెలుగుదేశం నిరంకుశ చర్య అని ఆయన అన్నారు.

కనీసం షోకాజ్ నోటీసు ఇచ్చే సంప్రదాయాన్ని కూడా పాటించకుండా నాగం జనార్దన్ రెడ్డిని పార్టీ నుంచి సస్పెండ్ చేశారని ఆయన విమర్శించారు. తెలంగాణవాదాన్ని బలంగా వినిపించడం వల్లనే నాగం జనార్దన్ రెడ్డిని సస్పెండ్ చేశారని ఆయన అభిప్రాయపడ్డారు. రంగారెడ్డి జిల్లా పరిగి తెలుగుదేశం శాసనసభ్యుడు కూడా నాగం జనార్దన్ రెడ్డి వెంటే ఉంటారని ఆయన అన్నారు.

English summary

TDP MLA Jogu Ramanna said that he will support Nagam Janardhan Reddy. He opposed suspension of Nagam Janardhan Reddy.