నాగం జనార్దన్ రెడ్డిని ఆహ్వానించిన కెసిఆర్, దూతగా జితేందర్ రెడ్డి

హైదరాబాద్: తెలుగుదేశం పార్టీ నుంచి సస్పెన్షన్‌కు గురైన శాసనసభ్యుడు నాగం జనార్దన్ రెడ్డిని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు తమ పార్టీలోకి ఆహ్వానించారు. నాగం జనార్దన్ రెడ్డి వద్దకు ఆయన తన దూతగా మాజీ పార్లమెంటు సభ్యుడు, పార్టీ నాయకుడు జితేందర్ రెడ్డిని పంపించారు. జితేందర్ రెడ్డి నాగం జనార్దన్ రెడ్డితో చర్చలు జరిపారు. జితేందర్ రెడ్డి కూడా మహబూబ్ నగర్ జిల్లాకు చెందినవారే. నాగం జనార్దన్ రెడ్డితో జితేందర్ రెడ్డికి సత్సంబంధాలున్నాయి.

తెలంగాణ కోసం కలిసి పనిచేద్దామని కెసిఆర్ నాగం జనార్దన్ రెడ్డికి జితేందర్ రెడ్డి ద్వారా సమాచారం పంపించారు. తమ పార్టీలోకి వస్తే నాగం జనార్దన్ రెడ్డిని ఆహ్వానిస్తామని తెరాస శాసనసభ్యుడు కెటి రామారావు మీడియా ప్రతినిధుల సమావేశంలో చెప్పారు. కాగా, నాగం జనార్దన్ రెడ్డితో తెలుగుదేశం శాసనసభ్యుడు జోగు రామన్న సమావేశమయ్యారు. జోగు రామన్న తమ పార్టీ అధ్యక్షుడు నారా చంద్రబాబు నాయుడి తెలంగాణ వైఖరిని వ్యతిరేకిస్తూ నాగం జనార్దన్ రెడ్డికి మద్దతిస్తున్నారు.

English summary

TRS president K Chandrasekhar rao invited suspended TDP MLA nagam janardhan reddy into his party. TRS leader Jitender Reddy held talks with Nagam Janardhan Reddy.