హరికృష్ణ అలకపై చంద్రబాబు ఆవేదన, తక్కువేమి చేశానని ప్రశ్న

By Pratap

Published: Sunday, May 29, 2011, 10:54 [IST]

హైదరాబాద్: మహానాడులో తన బావమరది, రాజ్యసభ సభ్యుడు నందమూరి హరికృష్ణ అలకపై తెలుగుదేశం పార్టీ అధ్యక్షుడు నారా చంద్రబాబు నాయుడు తీవ్ర ఆవేదన వ్యక్తం చేశారని సమాచారం. పార్టీ సీనియర్ నాయకుల వద్ద ఆయన తన ఆవేదనను వెళ్లబోసుకున్నట్లు చెబుతున్నారు. హరికృష్ణకు తానేమి తక్కువ చేశానని, హరికృష్ణకు తగిన గౌరవం ఇస్తూనే ఉన్నానని చంద్రబాబు అన్నట్లు సమాచారం. తాను ఒక్కడినై ఇతర పార్టీలను ఎదుర్కుంటుంటే హరికృష్ణ అనవసరమైన ఇబ్బందులు కలిగిస్తున్నారని ఆయన అన్నట్లు చెబుతున్నారు.

తాను ఇచ్చిన సమాధానానికి వైయస్సార్ పార్టీకి, తెలంగాణ రాష్ట్ర సమితికి దిమ్మ తిరిగిందని, ఇటువంటి స్థితిలో హరికృష్ణ అలక దెబ్బ తీసిందని ఆయన అన్నట్లు సమాచారం. వైయస్సార్ కాంగ్రెసు పార్టీ అధ్యక్షుడు వైయస్ జగన్ ఆత్మరక్షణలో పడ్డారని, తెరాస అధ్యక్షుడు కెసిఆర్ ఏం సమాధానం చెప్పాలో తెలియక సతమతమవుతున్నారని ఆయన అన్నట్లు తెలుస్తోంది. హరికృష్ణ అలకకు మీడియాలో అతి ప్రాధాన్యం లభించి, మిగతా విషయాలకు ప్రాధాన్యం తగ్గే పరిస్థితి ఏర్పడిందని, ఇది పార్టీకి నష్టం కలిగిస్తుందని చంద్రబాబు అన్నట్లు చెబుతున్నారు.

Published On May 29, 2011