తెలంగాణకు ఓకే అనకుంటే టిడిపికి భవిష్యత్తు లేదు: నాగం

By Srinivas

Published: Sunday, May 29, 2011, 15:53 [IST]

హైదరాబాద్: తెలుగుదేశం పార్టీ ప్రత్యేక తెలంగాణ రాష్ట్రానికి ఓకే అనకుంటే తెలంగాణ ప్రాంతంలో ఆ పార్టీకి భవిష్యత్తు ఉండదని ఆ పార్టీ బహిష్కృత శాసనసభ్యుడు నాగం జనార్దన్ రెడ్డి ఆదివారం అన్నారు. టిడిపిని తెలంగాణ ప్రజలే ఎక్కువ ఆదరించినందున తెలంగాణ ప్రజల మనోభావాలకు అనుగుణంగా పార్టీ నిర్ణయం తీసుకోవాలన్నారు. గతంలో కూడా తెలంగాణకు టిడిపి హామీ ఇచ్చిందని ఆ నిర్ణయానికి కట్టుబడి ఉండాలని ఆయన డిమాండ్ చేశారు.

తెలంగాణలో మహానాడుపై తీర్మానం చేయక పోవడం విచారకరమన్నారు. మహానాడు వేదికగా తెలంగాణపై ఒక్క మాట కూడా మాట్లాడలేదన్నారు. తెలంగాణకు సీమాంధ్ర ప్రజలు ఎవరూ వ్యతిరేకంగా లేరని, కేవలం నాయకులే వ్యతిరేకంగా ఉన్నారని అన్నారు. తెలంగాణకు టిడిపి ఓకే అనకుంటే అది కేవలం నాయకుల సమస్య కాదని ప్రతి టిడిపి కార్యకర్త సమస్య అన్నారు. తెలంగాణ కోసం ఇప్పటికే రెండు చోట్ల నగారాను చేపట్టామని త్వరలో అదిలాబాద్‌లో చేపడతామని అన్నారు.

Published On May 29, 2011