చంద్రబాబును నిలదీసిన హరీష్ రావు, సిఎం సవాల్‌కు జవాబేదని ప్రశ్న

By Pratap

Published: Monday, May 30, 2011, 18:09 [IST]

వరంగల్: అవిశ్వాస తీర్మానం ప్రతిపాదించాలని ముఖ్యమంత్రి కిరణ్ కుమార్ రెడ్డి విసిరిన సవాల్‌కు తెలుగుదేశం పార్టీ అధ్యక్షుడు నారా చంద్రబాబు నాయుడు స్పందించకపోవడంపై తెలంగాణ రాష్ట్ర సమితి (తెరాస) శానససభ్యుడు హరీష్ రావు నిలదీశారు. అవిశ్వాస తీర్మానం ప్రతిపాదించాలని ముఖ్యమంత్రి అన్నారని, దానికి చంద్రబాబు ఎందుకు స్పందించడం లేదని, దీనిపై తెలుగుదేశం తెలంగాణ నేతలు చంద్రబాబును నిలదీయాలని ఆయన సోమవారం మీడియా ప్రతినిధుల సమావేశంలో అన్నారు. కాంగ్రెసుతో చంద్రబాబు కుమ్మక్కయ్యారని, అందుకే అవిశ్వాసం ప్రతిపాదించడానికి వెనకంజ వేస్తున్నారని ఆయన విమర్శించారు.

పదవుల కోసం ఆశపడి తెలుగుదేశం పార్టీ తెలంగాణ ఫోరం నాయకులు తమ పార్టీపై విమర్శలు చేస్తున్నారని ఆయన అన్నారు. తెలుగుదేశం పార్టీ దయాదాక్షిణ్యాల మీద ఆధారపడే కిరణ్ కుమార్ రెడ్డి ప్రభుత్వం నడుస్తోందని ఆయన అన్నారు. కేంద్ర మంత్రి జైపాల్ రెడ్డి సహా 12 మంది కాంగ్రెసు తెలంగాణ ప్రాంత పార్లమెంటు సభ్యులు రాజీనామా చేస్తే తెలంగాణపై ఢిల్లీ కదిలి వస్తుందని ఆయన అన్నారు.

Published On May 30, 2011