ఇంటర్ విద్యార్థినిపై అత్యాచారయత్నం, యువకుడి సజీవ దహనం

By Srinivas

Published: Tuesday, May 31, 2011, 15:29 [IST]

వరంగల్: జిల్లాలోని జఫర్ ఘడ్ మండలం రఘునాథ్ పల్లి గ్రామంలో మంగళవారం ఘోర సంఘటన చోటు చేసుకుంది. గుర్తు తెలియని యువకుడు ఓ అమ్మాయిపై అత్యాచారానికి పాల్పడటంతో ఆ యువకుడిని గ్రామస్తులు సజీవ దహనం చేశారు. రఘునాథ్ పల్లి గ్రామానికి చెందిన మౌనిక అనే ఇంటర్ విద్యార్థినిపై గుర్తు తెలియని యువకుడు ఆమె ఇంట్లోనే అత్యాచారం చేయడానికి ప్రయత్నం చేశాడు. అయితే ఆమె అతని ప్రయత్నాన్ని అడ్డుకుంది. దీంతో రెచ్చిపోయిన సదరు యువకుడు ఆమెపై సుత్తితో దాడి చేశాడు. దీంతో ఆమె తలపై తీవ్ర గాయం ఏర్పడింది. రక్తస్రావం ఎక్కువయింది. దీంతో స్థానికులు ఆమెను వరంగల్ జిల్లా ఎంజిఎంకు తీసుకు వెళ్లారు. సుత్తితో బలంగా మోదడం వలన ఆమె పరిస్థితి విషమంగానే ఉన్నట్లు వైద్యులు చెబుతున్నారు.

అయితే మౌనికపై అత్యాచారానికి పాల్పడ్డ యువకుడికి గ్రామస్థులు దేహశుద్ది చేశారు. సంఘటనపై సమాచారం అందిన పోలీసులు సదరు యువకుడిని అరెస్టు చేసి తీసుకెళ్లేందుకు సిద్దమయ్యారు. ఆ సమయంలో మరోసారి గ్రామస్థులు ఆ యువకుడిని పోలీసు జీపులో నుండి బయటకు లాగి అతనిని చెట్టుకు కట్టేసి కొట్టి కిరోసిన్ పోసి సజీవ దహనం చేశారు. అయితే యువకుడిని అరెస్టు చేయడానికి ఎస్ఐ, ఇద్దరు పోలీసులు మాత్రమే రావడంతో వేలాదిగా ఉన్న గ్రామస్తులను నిలువరించడం కుదరలేదు. మౌనికపై యువకుడి దాడికి గల కారణాలను పోలీసులు కూపి లాగడానికి ప్రయత్నాలు చేస్తున్నారు. అతను ఒక్కడే ఉన్నాడా మరెవరైనా ఉన్నారా అనే కోణంలో కూడా దర్యాఫ్తు చేస్తున్నారు.

Published On May 31, 2011