నాగం ముందే టిడిపి నేతలకు షాక్: ఎమ్మెల్యేలను అడ్డుకున్న విద్యార్థులు

By Srinivas

Published: Wednesday, June 1, 2011, 12:13 [IST]

హైదరాబాద్: తెలుగుదేశం పార్టీ ప్రజాప్రతినిధులు ఎర్రబెల్లి దయాకరరావు, సీతక్క, మోత్కుపల్లి నరసింహులును ఉస్మానియా విశ్వవిద్యాలయ విద్యార్థులు బుధవారం బోయిగూడ రైల్వే కోర్టు వద్ద అడ్డుకున్నారు. వారు ఇటీవలే పార్టీ నుండి బహిష్కరింప బడిన నాగం జనార్దన్ రెడ్డి ముందే అడ్డుకోవడం విశేషం. గతంలో రైల్ రోకో సందర్భంగా రైలును ఆగిపోవడానికి కారణమైన నాగర్ కర్నూల్ శాసనసభ్యుడు నాగం జనార్దన్ రెడ్డితో పాటు వారు బోయిగూడ రైల్వే కోర్టుకు హాజరయ్యారు. అయితే ఉస్మానియా విద్యార్థులు నాగం జనార్దన్ రెడ్డిని వదిలి వేసి ఎర్రబెల్లి, మోత్కుపల్లి, సీతక్కలను అడ్డుకున్నారు.

ప్రత్యేక తెలంగాణ కోసం వెంటనే రాజీనామాలు చేయాలని డిమాండ్ చేశారు. లేకుంటే తెలంగాణకు అనుకూలంగా పార్టీ వైఖరిని ప్రకటించేలా చర్యలు తీసుకోవాలన్నారు. లేదంటే తెలంగాణలో టిడిపి ప్రజాప్రతినిధులను అడ్డుకుంటామని హెచ్చరించారు. జై తెలంగాణ నినాదాలు చేశారు. అయితే వారిని టిడిపి నేతలు ప్రతిఘటించారు. తాము తెలంగాణకు కట్టుబడే ఉన్నామని స్పష్టం చేశారు.

Published On June 1, 2011