పదవి అడగడానికి సోనియాను కలవలేదు: రోశయ్య

By Srinivas

Published: Wednesday, June 1, 2011, 12:40 [IST]

న్యూఢిల్లీ: తనకు ఏ పదవో కావాలని అడగడానికి ఏఐసిసి అధ్యక్షురాలు సోనియాగాంధీని కలవలేదని మాజీ ముఖ్యమంత్రి కొణిజేటి రోశయ్య బుధవారం విలేకరులతో మాట్లాడుతూ స్పష్టం చేశారు. తాను పదవి కోసం అధిష్టానం పిలిస్తే వచ్చానన్న వార్తల్లో ఎలాంటి నిజం లేదన్నారు. తాను గవర్నర్ పదవి కోసమే న్యూఢిల్లీ వచ్చినట్లు మీడియాలో కథనాలు వస్తున్నాయని వాటికి తాను సమాధానం చెప్పవలసిన అవసరం లేదన్నారు.

మీడియావి అన్నీ ఊహాగానాలే అన్నారు. ఐదు రాష్ట్రాల ఎన్నికల ఫలితాలపై సోనియాను అభినందించినట్లు చెప్పారు. రాష్ట్రంలో కాంగ్రెసు పరిస్థితిపై సోనియాతో చర్చించినట్లు చెప్పారు. తాను సంచలనాలకు ఎప్పుడూ దూరంగా ఉంటానని చెప్పారు. ఫలానా వారికే ప్రదేశ్ కాంగ్రెసు కమిటీ అధ్యక్షుడు పదవి ఇవ్వాలని తాను కోరలేదన్నారు.

Published On June 1, 2011