గుంటూరులో యువతి అత్యాచారం, హత్య?: కాల్చిన దుండగులు

By Srinivas

Published: Wednesday, June 1, 2011, 18:05 [IST]

గుంటూరు: జిల్లాలోని బుడంపాడు గ్రామంలోని తోటలో ఓ యువతిని కొందరు దుండగులు కాల్చి వేసి హత్య చేశారు. మహిళను హత్య చేసిన ఈ తోట ఎన్‌హెచ్-5 రహదారి సమీపంలోనే ఉండటం విశేషం. సదరు యువతిపై ఎవరో దుండగులు అత్యాచారం చేసి హత్య చేసి ఉంటారని పోలీసులు భావిస్తున్నారు. అక్కడి పరిస్థితులు చూస్తుంటే కూడా అలాగే కనిపిస్తున్నాయి. మహిళ చేతులు వెనక్కి వంచి ఉన్నాయి. గాజులు పగిలి పోయాయి. దీన్ని బట్టి హత్యకు ముందు పెనుగాలాడినట్లు పోలీసులు భావిస్తున్నారు. కాల్చి వేయడంతో ఆమె తలభాగం పూర్తిగా కాలిపోయింది.

యువతి ఎవరూ అనే కోణంలో పోలీసులు దర్యాఫ్తు చేస్తున్నారు. ఆమె స్థానిక యువతా లేక ఇతర ప్రాంతం నుండి తీసుకు వచ్చి అత్యాచారం చేసి చంపారా అనే కోణంలో దర్యాఫ్తు చేస్తున్నారు. డాగ్ స్క్వాడ్‌ను తీసుకు వచ్చి పరిశీలించినట్లుగా తెలుస్తోంది. ప్రక్కన పొల్లాల్లో పని చేస్తున్న పలువురు శవం విషయాన్ని గుర్తించి మీడియా దృష్టికి తీసుకు వచ్చారు.

Published On June 1, 2011