అవిశ్వాసానికి సరే అంటే...: పోటీపై వెనక్కి తగ్గిన తెలుగుదేశం!

హైదరాబాద్: అధికార కాంగ్రెసు ప్రభుత్వంపై అవిశ్వాస తీర్మానానికి నోటీసులు ఇచ్చిన తెలుగుదేశం పార్టీ సభాపతి పదవికి కూడా తమ అభ్యర్థిని పోటీకి నిలపాలనే యోచనలో కాస్త వెనక్కి తగ్గేట్లుగా కనిపిస్తోంది. సభాపతి పోటీకి కర్నూలు జిల్లాకు చెందిన కెఇ కృష్ణమూర్తిని దింపాలని టిడిపి యోచించింది. దీనిపై సీనియర్లు విభేదిస్తున్నట్టుగా తెలుస్తోంది. పోటీకి దింపాలని యువ ఎమ్మెల్యేలు అంటే వద్దని సీనియర్లు సూచించినట్టుగా తెలుస్తోంది. సభాపతి ఎంపిక ఏకగ్రీవంగా కావడానికి ప్రభుత్వం కోరుతున్న నేపథ్యంలో ఎలాగు తాము గెలిచే అవకాశం లేదు కాబట్టి ప్రొటెం స్పీకరు అవిశ్వాస తీర్మాన నోటీసుకు స్పందించి అవిశ్వాసం చర్చకు అనుమతిస్తే సభాపతి పోటీ రంగం నుండి తప్పుకోవాలని నిర్ణయంచుకున్నట్లుగా తెలుస్తోంది.

ఒకవేళ ప్రొటెం స్పీకరు అవిశ్వాస చర్చకు అంగీకరించని సమయంలో సభాపతి పోటీకి రంగంలోకి దిగాలని నిర్ణయించుకున్నట్లుగా తెలుస్తోంది. సభాపతి ఎన్నిక కోసం జరుగుతున్న ప్రత్యేక సమావేశాలలో అవిశ్వాసానికి మార్గం లేదని పలువురు అనుమానం వ్యక్తం చేస్తున్న నేపథ్యంలో ప్రొటెం స్పీకరుకు ఆ హక్కు ఉంటుందని టిడిపి భావిస్తుందని తెలుస్తోంది. కాగా శాసనసభా వ్యవహారాల మంత్రి శ్రీధర్ బాబు టిడిపి ఎమ్మెల్యే పయ్యావుల కేశవ్‌ను కలిసి సభాపతి ఎన్నికకు సహకరించాలని కోరారు. చంద్రబాబు అందుబాటులో లేక పోవడంతో ఆయన పయ్యావులను కోరారు. ఈ విషయాన్ని తమ అధినేత దృష్టికి తీసుకు వెళతానని ఆయన చెప్పారు.

English summary

It seems Telugudesam Party is rethinking on speaker post. TDP may demand government for no confidential vote. TDP will contest for speaker if protein speaker rejects no confidential talks.