చంద్రబాబు, వైయస్ జగన్ కుమ్మక్కయ్యారా చెప్పాలి: శ్రీధర్ బాబు

By Pratap

Published: Saturday, June 4, 2011, 16:04 [IST]

హైదరాబాద్: అవిశ్వాస తీర్మానం గురించి మాట్లాడుతున్న తెలుగుదేశం పార్టీ అధ్యక్షుడు నారా చంద్రబాబు నాయుడు, వైయస్సార్ కాంగ్రెసు పార్టీ అధ్యక్షుడు వైయస్ జగన్ కుమ్మక్కయ్యారా చెప్పాలని శాసనసభా వ్యవహారాల మంత్రి శీధర్ బాబు డిమాండ్ చేశారు. వారిద్దరే అవిశ్వాస తీర్మానం గురించి మాట్లాడుతున్నారని ఆయన అన్నారు. తాము సభా విశ్వాసం పొందామని ఆయన శనివారం మీడియా ప్రతినిధుల సమావేశంలో అన్నారు. ప్రభుత్వంపై విశ్వాసం పోయింది కాబట్టే స్పీకర్ పదవికి పోటీ పెడుతున్నామని ప్రధాన ప్రతిపక్షం తెలుగుదేశం పార్టీ చెప్పిందని, అందువల్ల స్పీకర్ పదవిని గెలుచుకోవడం ద్వారా తాము విశ్వాసం పొందినట్లేనని ఆయన అన్నారు.

అవిశ్వాసం తీర్మానంపై చర్చ తర్వాత కూడా స్పీకర్ ఎన్నిక సందర్భంగా జరిగిన వోటింగ్ మాదిరిగానే వోటింగు జరుగుతుందని, అందువల్ల తాము సభా విశ్వాసం పొందినట్లేనని ఆయన అన్నారు. అయితే, స్పీకర్ అనుమతిస్తే తాము అవిశ్వాస తీర్మానాన్ని ఎదుర్కోవడానికి సిద్ధంగా ఉన్నామని ఆయన చెప్పారు. ప్రగల్భాలు పలికినప్పుడు సవాల్‌ను స్వీకరిస్తామని తాము చెప్పామని ఆయన అన్నారు. అవిశ్వాస తీర్మానం సందర్భంగా ప్రతిపక్షాల విమర్సలను తిప్పికొట్టే అవకాశం తమకు కూడా వస్తుందని ఆయన అన్నారు.

Published On June 4, 2011