రామ్‌దేవ్ అరెస్టుతో పోరాటం ఆగదు: కేంద్రాన్ని హెచ్చరించిన నరేంద్ర మోడీ

By Srinivas

Published: Sunday, June 5, 2011, 13:03 [IST]

గాంధీనగర్/చెన్నై: ప్రముఖ యోగా గురువు బాబా రామ్‌దేవ్‌ను అరెస్టు చేసినంత మాత్రాన కేంద్ర ప్రభుత్వం అవినీతి, అక్రమాలపై పోరాటం ఆగదని గుజరాత్ ముఖ్యమంత్రి నరేంద్ర మోడి ఆదివారం హెచ్చరించారు. అవినీతిపై మాట్లాడిన వారిని కేంద్ర ప్రభుత్వం జైలులో పెట్టాలని చూస్తుందని ఆరోపించారు. విదేశాలలో ఉన్న నల్లడబ్బును వెనక్కి తెప్పించాలని ఆయన డిమాండ్ చేశారు. దేశంలో పేరుకు పోయిన అవినీతిపై ఆందోళన చేస్తున్న రామ్ దేవ్‌ను అరెస్టు చేయడం దుర్మార్మమన్నారు. ఇది చరిత్రలో చీకటి రోజు అన్నారు. యుపిఏ చేస్తున్న ప్రతి తప్పిదానికి ప్రధానమంత్రి బాధ్యత వహించాలని ఆయన డిమాండ్ చేశారు. దేశాన్ని మరోమారు అత్యయిక పరిస్థితిలోకి తీసుకు వెళ్లే ప్రయత్నాలు కేంద్రం చేస్తుందని ఆరోపించారు.

కాగా బాబా అరెస్టు అప్రజాస్వామికం అని భారతీయ జనతా పార్టీ మాజీ జాతీయ అధ్యక్షులు, మాజీ ఉప ప్రధాని ఎల్‌కె అద్వానీ చెన్నైలో ఖండించారు. బాబా అరెస్టును ప్రతి ఒక్కరూ ఖండించాలన్నారు. అరెస్టు చేసినందుకు కేంద్రంలోని నేతలు, మంత్రులు అందరూ ప్రజలకు, బాబాకు క్షమాపణ చెప్పాలని డిమాండ్ చేశారు.

Published On June 5, 2011