రాజీనామా తెలంగాణ కోసమే ఉప ఎన్నికలకు కాదు: మధు యాష్కీ

By Srinivas

Published: Tuesday, June 7, 2011, 16:48 [IST]

హైదరాబాద్: తాము ఈసారి చేసే రాజీనామా తెలంగాణ కోసమే కాని ఉప ఎన్నికల కోసం చేయమని నిజామాబాద్ పార్లమెంటు సభ్యుడు మధుయాష్కీ మంగళవారం అన్నారు. ప్రత్యేక తెలంగాణ రాష్ట్రం రావాలంటే తెలంగాణ నేతలంతా పార్టీలకతీతంగా రాజీనామా చేయాలని డిమాండ్ చేశారు. అంతా కలిసి కట్టుగా ఏర్పడి ఒక ఫ్రంట్‌గా ఏర్పడి రాజీనామా చేసి కేంద్రంపై ఒత్తిడి తీసుకు రావాలన్నారు. ఈసారి అధిష్టానంతో జరిగే చర్చలు తెలంగాణ సాధన దిశగా ముందుగు వెళతాయని ఆయన స్పష్టం చేశారు. కేంద్రం తెలంగాణ ప్రకటించకుంటే జూలై 1 నుంచి ప్రత్యక్ష కార్యాచరణ ఉంటుందన్నారు.

కాగా అంతకుముందు తెలంగాణ లాయర్లు పలువురు మధుయాష్కీ ఇంటిని చుట్టుముట్టారు. కేంద్రం తెలంగాణ ప్రకటించకుంటే తాను జూన్ 1వ తేదిన రాజీనామా చేస్తానని ప్రకటించాడని దానికి ఆయన కట్టుబడి ఉండాలని డిమాండ్ చేశారు. ఆయన ఇచ్చిన మాటకు కట్టుబడి ఉండి వెంటనే రాజీనామా చేయాలని అన్నారు. లాయర్ల ఆందోళనతో బయటకు వచ్చిన మధుయాష్కీ బయటకు వచ్చి వారితో మట్లాడారు.

Published On June 7, 2011